aps | rus | eng | tur | de | it | ar | esp | fr


Аԥсны Аҳәынҭқарра
Адәныҟатәи аусқәа рминистрра

Аимадаратә информациа:
Аҭыӡҭыԥ: 384900 Лакоба имҩа 21, ақ. Аҟәа
+7 940 996 39 48 (амоб.)
+7 840 226 39 48 (аус.)
E-mail: visa@mfaapsny.org


Гал ақалақь аҟны имҩаԥысит изаамҭанытәиу, 47-тәи аинцидентқәа раԥырҟәҟәаарази хырыҩ рыҭарази Амеханизм алахәылацәа реиԥылара
Приднестровтәи Молдавтәи Ареспублика адәныҟатәи аусқәа Рминистрра аҿы Даур Ақаҩбеи Витали Игнатиеви реиҧылара мҩаҧысит

04.04.2013

23-тәи Женеватәи аиҿцәажәарақәа рылҵшәақәа ирызкны Иракли Хынҭәба апресс-конференциа мҩаԥигеит

Аахыҵ Кавказ аҭынчреи аҭышәынтәалареи рзы 23-тәи Женеватәи аиҿцәажәарақәа рылҵшәақәа ирызкын аԥсуа делегациа аиҳабы Иракли Хынҭәба имҩаԥигаз апресс-конференциа. Абрифинг рхы аладырхәит иара убас аделегациа иалахәыз адипломатцәа Инар Гыцбеи Кан Ҭаниеи.

«Аиҿцәажәарақәа ишаԥу еиԥш ҩ-усуратә гәыԥк рҟны имҩаԥысуан – ашәарҭадареи агуманитартә зҵаарақәеи рзы», – иҳәеит Хынҭәба.

Иара иажәақәа рыла, ашәарҭадаразы агәыԥ аҿы раԥхьаӡа иргыланы излацәажәоз амч ахамырхәара азҵаара акәын, избан акәзар Женеватәи аиҿцәажәарақәа рхықәкы хадас иҟоу арегион аҟны аҭынчра аазгаша азинә мчра змоу адокумент адкылара ауп. «Арҭ аиҿцәажәарақәа рҿы аус адаҳулон амч ахамырхәаразы Женеватәи аиҿцәажәарақәа рылахәцәа Рҳәамҭа. Апроект аздырхиеит Женеватәи аиҿцәажәарақәа реицхантәаҩцәа, аганқәа зегьы, аԥсуа гангьы уахь иналаҵаны, уи аус адырулон, – иҳәеит Хынҭәба. – Еиду Амилаҭқәа Реилазаареи, Евро-Еидгылеи, ОБСЕи рҟынтә аицхантәаҩцәа адокумент апроект Женеватәи апроцесс иалахәу атәылақәа раҳҭнықалақьқәа рахь иргон, иалацәажәон. Агәыӷра ҳаман апроект рыдыркылоит ҳәа, ма ианамуӡах уи адкылара шаҭаху азы акаҿы ҳаиқәшаҳаҭхоит ҳәа. Амч ахамырхәаразы аҳәамҭа апроект ишьақәнарӷәӷәар алшон Аԥсныи, Аахыҵ Уаԥстәылеи, Қырҭтәылеи рхадацәа ганкахьала амч ахамырхәаразы иҟарҵахьаз аҳәамҭақәа, уи бжьаратәи шьаҿахон азинмчра змоу аиқәшаҳаҭрақәа рыдкыларазы. Уи адагьы ари аҳәамҭа адкылара Женеватәи аиҿцәажәарақәа рыҩнуҵҟа ишьақәгыланы иҟоу аҭагылазаашьа еиӷьнатәуан, сгәанала, аганқәа реизаагәахара, реилибакаара иацхраарын, аԥсуа ҳәынҭқарра иазеиӷьхаша алҵшәақәа раиураҿы ицхыраагӡахон. Аха, рыцҳарас иҟалаз, қырҭтәылатәи аган ари аус еиҵарҟьеит, Урыстәыла аганахьала амч ахамырхәаразы адекларациа ыҟазароуп ҳәа мзызс иҟаҵаны. Иара убри ала Женеватәи аиҿцәажәарақәа аханатә инаркны аусуратә атмосфера ирыцыз ԥырган».

И. Хынҭәба игәаанагарала, Қырҭтәыла аганахьала ари – аԥсыҽра аарԥшреи, ишьақәгылаз аҭагылазаашьа адымкылареи роуп изызҳәоу. «Ари ҽазныкгьы иаҳнарбоит қырҭтәылатәи анапхгара рхаҿраҵҿҟьа зеиԥшроу, урҭ амч ахамырхәара рыхгьы иҭам». Убри аан аминистр ихаҭыԥуаҩ агәыӷра ааирԥшит ԥхьаҟа Қырҭтәыла апозициа аԥсахуеит ҳәа.

Аԥсуа ган акәзар, иара иажәақәа рыла, уи даара активла, хықәкыла аус ауан. «Убасҵәҟьа активла аус руан Урыстәылеи Аахыҵ Уаԥстәылеи рделегациақәа, зегьы ирзеиԥшны алҵшәа бзиақәа раагара рҽазышәо. Ари Аҳәамҭа апроект Қырҭтәылагьы иаднакылартә иҟан, аха ус шакәугьы дара уажәазы мап ркит», – иҳәеит Хынҭәба.

Аԥсуа ган еиҭагьы азҵаара ықәнаргылеит аиҿцәажәарақәа рымҩаԥгара еиҳа еиӷьу аформа ҿыцқәа ирызкны.

«Аԥсны Адәныҟатәи аусқәа рминистр Виачеслав Чрыгба уаанӡатәи аиԥыларақәа раан изныкымкәа ажәалагала ҟаиҵахьан аҩ-усуратә гәыԥк амш аҩбатәи азбжазы реидкыларазы, аделегациақәа зегьы злахәу аилацәажәара амҩаԥгаразы, еицырзеиԥшу азҵаарақәа рылацәажәаразы», – иҳәеит Хынҭәба. Ҳәарада, аполитикатәи агуманитартәи зҵаарақәа еидҳәалоуп, убри аҟнытә ас еиԥш аидкылара иаҭаху акоуп. Аха аилатәара азал аҿы зегь еизо ианалага, ҳара игәаҳҭеит аделегациақәа зегь рылахәцәа аӡә дагымкәа еицны ишааиз, қырҭтәылатәи аган ада. Урҭ рҟынтә 4-ҩык мацара ааит аделегациа анапхгаҩцәа рахьгьы иаҵанамкуаз, зынӡагьы иара аусурагьы иалахәымыз». Аԥсуа ган – ари аиқәшаҳаҭрақәа реиҵырҟьара, аусура мап ацәкра аҳасабала иҳадаҳкылеит.

«Қырҭтәылатәи аган Женеватәи апроцесс ахь иконструктивтәым азнеишьала ахала иаанхеит. Сара изласыԥхьаӡо ала – ари ҳаҭырқәҵарам иаанаго аҳәынҭқарра дуқәа Урыстәылеи, Еиду Америкатә Штатқәеи рганахьалагьы, урҭ рхаҭарнакцәа аӡә дагымкәа зегь аизарахь инеит, – иҳәеит Хынҭәба. – Убри аҟнытә сара сгәаанагарала қырҭтәылатәи аган азы арҭ аиҿцәажәарақәа рраунд маншәаламхеит. Ҳара ҳтәы ҳҳәозар, 23-тәи араунд аҳәаақәа ирҭагӡаны ҳтәыла аиҳабыра ҳҿаԥхьа иқәнаргылаз ахықәкқәа нагӡоуп. Амч ахамырхәаразы Аҳәамҭеи егьырҭ аинтерес ахьҳамоу азҵаарақәеи ԥхьаҟагьы аус рыдаҳулоит».

Аԥсуа делегациа аиҳабы ишазгәеиҭаз ала, аҩбатәи аусратә гәыԥ аҟны иззааҭгылаз иалкааны Гал араион аҿы ашәарҭадара азҵаара акәын, насгьы Аԥсны агуманитартә ҭагылазаашьеи, жәларбжьаратәи аиҿкаарақәа русуреи. «Аҳәаанырцәтәи ҳколлегацәа ргәы иҵхоит Қырҭтәылеи ҳареи ҳҳәаа арӷәӷәара азҵаара. Ҳара ираҳҳәеит ари апроцесс ишахьчо Гал араион иқәынхо ауааԥсыреи иара зеиԥшла Аԥсны атәылауааи. Ари даараӡа ихадароу зҵаароуп, ҳҳәынҭқарратә ҳәаа арӷәӷәара ҳаԥхьаҟагьы ҳашьҭазаауеит», – иҳәеит Хынҭәба.

Иара иажәақәа рыла, Гал араион аҭагылазаашьа аиӷьтәразы иҳәаз рацәан. Хынҭәба иҵаҵӷәыдоуп ҳәа иԥхьаӡоит ақырҭуа-аԥсуа ҳәаа хақәиҭрала ахысра залшом ҳәа аԥсуа ган ирырҭо аҽԥныҳәақәа. Иара игәаанагарала, ари азҵаара зынӡагьы алацәажәара иаԥсам, избан акәзар Аԥсныи Қырҭтәылеи ирыбжьоу аҳәаа зхы иақәиҭу, ихьыԥшым ҩ-ҳәынҭқаррак рыбжьара иҟоу ҳәынҭқарратә ҳәаауп.

«Аиҭанеиааира ҳаналацәажәо, Европа аҭаара зҭаху ҳтәылауаа авизақәа анрырымҭо атәы заҳамҳәои, Аԥсны иҟоу Урыстәылатәи Афедерациа ацҳаражәҳәарҭа ирынаҭаз атәылауаҩшәҟәқәа зынӡагьы ирыхәаԥшӡом. Ари азҵаара есымша иқәҳаргылоит, хара имгакәа алҵшәа бзиақәа шҳауа агәра шәсыргоит», – ҳәа азгәеиҭеит Хынҭәба.

Зеиԥшла, аминистр ихаҭыԥуаҩ иажәақәа рыла, жәларбжьаратәи анаԥшцәа иазгәарҭоит Аԥсны ашәарҭадара аҭагылазаашьа шеиӷьхаз.

Аԥсуа делегациа аиҳабы ҽазныкгьы иаликааит Женеватәи аиҿцәажәарақәа Аԥсны иазкны уи аӷацәа идәықәырҵо ауҳәан-сҳәанқәа раԥыхразы ишыцхыраагӡа бзиоу.

«Иҟоуп шьоукы гха хәыҷык ҳамазаргьы иацҵаӡаны ацәыргара иашьҭоу, ҳабзиа рымбаӡакәа, ҳацәгьа аԥшаара зҽазҵәылызхуа. Ҳара жәларбжьаратәи аҩаӡараҿы урҭ аҭак раҳҭоит. Ари иаҭаху акоуп, избанзар иахьатәти ҳаамҭаз аҳәынҭқарра иамоу ахыԥша даара акраҵанакуеит», – иҳәеит адәныҟатәи аусқәа рминистр.

И. Хынҭәба иаҿаԥиҽит қырҭтәылатәи асаитқәа руак аҿы ицәырҵыз аинформациа: Женева аԥсуа дипломатцәа алархәны излацәажәаз қырҭтәылатәи ахҵәацәа шәарҭарада Аԥсныҟа рырхынҳәра азҵаара. «Шьоукы агәра ргоит қырҭтәылатәи асаит Абхазети.инфо иану аинформациеи Қырҭтәыла адәныҟатәи аусқәа рминистр Залкалиани иҳәамҭеи, насгьы Аԥсны Адәныҟатәи аусқәа рминистрра аҳаҭырларҟәра иашьҭоуп. Сара ҭакԥхықәрала исҳәоит ахҵәацәа рызҵаара ҳаламцәажәоижьҭеи акырӡа шҵуа. Ҳалацәажәарцгьы ҳгәы иҭам. Убри аҟнытә ари азҵаара аганахьала ирҳәалакгьы ҳтәылауаа агәра рымгароуп», – ҳәа инаҵшьны иазгәеиҭеит Хынҭәба.

Уи моу, Аԥсны ада адунеи аҿы даҽа тәылак ыҟам, 1999 шықәса инаркны Гал араион ахь абысҟаҩык ауааԥсыра зыргьежьхьоу. Аполитикатә оппозициеи аекспертцәа реилазаареи рхаҭарнакцәа лассы-лассы Адәныҟатәи аусқәа рминистрра аусура акритика ахьазыруа азҵааара адипломат абас аҭак ҟаиҵеит: «Гәалсроуп иалкаау ауаа, ҳтәылаҿы иара уи анҭыҵгьы ҳаҭыр зқәу, ҳҳәынҭқарра аргылара зааԥсара аду, иишамкәа акритика ахьрырҭо».

«Ҳминистрра аусура иахьатәи аамҭаз даара иаартуп. Ҳазҿу аусқәа рзы, ихадароу аидеиақәа, аминситрааҿы имҩаԥысуа аиҭакрақәа, адәныҟатәи аполитикаҿы ҳшьаҿақәа уҳәа зегь рзы ҳтәыла ауааԥсыра аинформациа рызнагаразы иҟаҳҵо рацәоуп. Аха излазбо ала, аинформациа аҭара аганахьала еиҳа аус утәуп, иаарлас-аарласны ажурналистцәеи ауаажәларра ахаҭарнакцәеи ҳарԥылалароуп. Абри ҳалацәажәон аҳәынҭқарра ахадеи ҳареи иахьатәи ҳаицәажәараҿы. – азгәеиҭеит Хынҭәба. – Ауаа ргәаанагара есымша ҳазҿлымҳауп. Аминистрраҟны иаԥҵоуп Ауаажәларратә експерттә хеилак, уи иалоуп адәныҟатәи аполитикаҿы здырра ыҟоу еицырдыруа ауаа. Аоппозициатә партиа аиҳабырагьы алахәхарц ааԥхьара раҳҭеит, уи уажәгьы амч амоуп. Еиуеиԥшым агәаанагарақәа ҳаҳаларц ҳҭахуп».

Хынҭәба иашам ҳәа иԥхьаӡоит «аналитикатә усура ахатә амбициақәа рынагӡаразы хархәагас аҟаҵара». «Адәныҟатәи аусқәа рминистрра аусура ахәшьара аҭалатәуп, аха ҳусура аконцептуалтә шьаҭақәа акритика рзыуразы амц аиқәырҽаҽара ҟалом. Аиаша абла ҳҭаԥшлароуп,» – азгәеиҭеит Хынҭәба.

Иара иазгәеиҭеит иара убасгьы Женеватәи аиҿцәажәарақәа рҿы аԥсуа делегациа алахәра акәша-мыкәша ицәырҵуа ацәажәарақәа.

«Уажәтәи аформат ала аиҿцәажәарақәа ҳхы ахьрылаҳархәуа ҳпозициақәа ланарҟәуеит ҳәа ирԥхьаӡозаап. Сара сымҩашьакәа исҳәарц сҭахуп – ари ҳсуверенитет уи зынӡа ианыруам. Ҳара зегьы – Еиду Америкатә Штатқәа, Урыстәылатәи Афедерациа, Қырҭтәыла, Аԥсны, Аахыҵ Уаԥстәыла ахаҭарнакцәа – Женеватәи аиҿцәажәарақәа ҳрылахәуп аекспертцәа раҳасабала», – иҳәеит Хынҭәба. МГИМО аҭаларазы абитуриентцәа ралхра шымҩаԥысуа иазкны азҵаара аҭак ҟаҵо Хынҭәба иазгәеиҭеит: «МГИМО аҭаларазы иреиӷьу абитуриентцәа ралхразы аминистрраҿы аусура рацәаны имҩаԥысуеит. Иахьа ари аҵараиурҭаҿы аҵара рҵоит 24-ҩык астудентцәеи, 5-ҩык аспирантцәеи. Урҭ зегь қәҿиарала рҵара хдыркәшар, апрофессионалтә дипломатцәа маҷҩымкәа иҳауеит». Аԥышәарақәа аицлабра шьаҭала имҩаԥысуеит. 2012 шықәсазы 5-ҩык МГИМО иҭалеит, сынтәагьы даҽа 5-ҩык ҭалоит.

Аминистр ихаҭыԥуаҩ инаҵшьны иазгәеиҭеит «аибадыррала, уала-ҭахыла ҳәа, ма аҭел асрақәа аԥышәара алҵшәақәа рахь анырра шырзыҟамҵо». «Аԥышәарақәа убас имҩаԥаҳгалоит реиҳа абаҩхатәра змоу, ибзианы иазыҟаҵоу, ҳаԥхьаҟа ҳҳәынҭқарра аинтересқәа рыхьчара зылшаша аҿар ралхразы. Адыррақәеи, аинтеллекти, аҵареи роуп МГИМО аҭалара алзыршо», – иҳәеит Иракли Хынҭәба.

Мшаԥымза 15-нӡа арзаҳалқәа рыдкылара мҩаԥысуеит, нас аиҿцәажәарақәа мҩаԥгахоит, лаҵарамзазы – аԥышәарақәа ирылагоит.

http://apsnypress.info/news/8639.html

Женеватәи аиҿцәажәарақәа рформат иазкны:

Женеватәи аиҿцәажәарақәа рформат акәша-мыкәша иҟоу ацәажәарақәа зегьы рҳәаақәҵаразы ҽазныкгьы еиҭасҳәоит. «Абри аформат алахәхара Аԥсны иамоу астатус ланарҟәуеит …» ҳәа ирҳәо иашам. Ҩ-усуратә гәыԥк аекспертцәа рыстатус ҳаманы ҳалахәуп. Иара убасҵәҟьа аус руеит Урыстәыла, Америка, Аахыҵ Уаԥстәыла, Қырҭтәыла рхаҭарнакцәагьы. Ари иаанаго – зегьы еиҟароу астатус ҳамоуп ауп. Ҳара ҳполитикатә статус уи азы ԥырхага амаӡам. Даҽа усуп, ишьақәгылаз аформат азинмчра змоу адокумент адкыларазы алшара ахьҳанамҭо. Ари еиԥш апроблема ыҟоуп. Аҭагылазаашьа аԥсахра ҳҽазаҳшәоит, Женеватәи аиҿцәажәарақәа рымҩаԥгара еиҭакрақәак ҳзалагалозар ҳәа ҳгәы иҭоуп. Азеиԥш еизара мҩаԥаагап ҳәа ажәалагала ҟаҳҵеит, иҟалап даҽа формақәак адгалахозар.

Аидысларақәа раԥырҟәҟәаареи анырра рыҭареи рзы амеханизми ашәарҭадареи ирызкны:

Амеханизм аҳәаақәа ирҭагӡаны Гал имҩаԥысуаз аилацәажәарақәа идыру амзызқәа ирыхҟьаны ишымҩаԥымсуа азгәаҳҭеит. Аха ус шакәугьы ашәарҭадаратә ҭагылазаашьа аиӷьхара иаҿуп. Амеханизм аусуреи Гал араион аҟны ашәарҭадаратә ҭагылазаашьа аиӷьхареи рыбжьара еимадарак ыҟани иаҳбом. Астандартқәа зегь ирықәшәо аҳәаа арӷәӷәаразы аусқәа ацара иаҿуп. Аԥсуа-қырҭуа ҳәаа иахьа ихьыԥшым ҩ-ҳәынҭқаррак ирыбжьоу аҳәынҭқарратә ҳәаак аҳасабала иҟоуп. Жәларбжьаратәи аекспертцәа зеиԥшла Аԥсны ашәарҭадара аҭагылазаашьа еиӷьхеит ҳәа азгәарҭоит.


Возврат к списку



Аԥсны иазкны

Аминистрра

Адәныҟатәи аполитика

Аконсултә дырраҭара

Аналитика

Разработка сайта: ait
АԥСНЫ АҲӘЫНҬҚАРРА АДӘНЫҞАТӘИ АУСКӘА РМИНИСТРРА E-mail: info@mfaapsny.org; Tel: +7 (840) 226-70-69; Adress:. Lakoba, 21