aps | rus | eng | tur | de | it | ar | esp | fr


Аԥсны Аҳәынҭқарра
Адәныҟатәи аусқәа рминистрра

Аимадаратә информациа:
Аҭыӡҭыԥ: 384900 Лакоба имҩа 21, ақ. Аҟәа
+7 940 996 39 48 (амоб.)
+7 840 226 39 48 (аус.)
E-mail: visa@mfaapsny.org


Гал ақалақь аҟны имҩаԥысит изаамҭанытәиу, 47-тәи аинцидентқәа раԥырҟәҟәаарази хырыҩ рыҭарази Амеханизм алахәылацәа реиԥылара
Приднестровтәи Молдавтәи Ареспублика адәныҟатәи аусқәа Рминистрра аҿы Даур Ақаҩбеи Витали Игнатиеви реиҧылара мҩаҧысит

Ҭырқәтәылатәи Ареспубликаҿы Аԥсны акультура амшқәа 08.05.2013

Ҭырқәтәылатәи Ареспубликаҿы Аԥсны акультура амшқәа

Лаҵарамза 3 инаркны 4-нӡа Сҭамԥыл ақалақь иатәу Карҭал араион аҟны имҩаԥысуан Аԥсны акультура амшқәа. Ари аусмҩаԥгатә еиҿыркааит Картал араион ахадареи Кавказтәи акультуратә центрқәа рфедерациеи еилахәны.

Картал араион ахадара иҟанаҵаз ааԥхьарала аусмҩаԥгатә рхы аладырхәит Аԥсны акультура аминистр Бадра Гәынба напхгара зиҭоз аԥснытәи аделегациа. Аделегациа иалахәын: Аҟәа ақалақь ахада ихаҭыԥуаҩ А. Кәортуа, Аԥсны Жәлар Реизара адепутатцәа Д. Гәымба, В. Аҩӡба, Аԥсны Адәныҟатәи аусқәа рминистрра Ҭырқәтәылеи Мрагылара Ааигәеи рыҟәша ареферент А. Асабуа, Аҟәа ақалақьтә еизара адепутатцәа. Аныҳәатә усмҩаԥгатәқәа ирылахәын ансамбль «Аԥсны-67», афольклортә ансамбль «Гәында», ахәыҷтәы кәашаратә коллектив «Абаза», иара убасгьы Аԥсны жәлар рпоет М. Лашәриа, Аԥсны асахьаҭыхыҩцәеи, акультура аусзуҩцәеи.

Аԥсны акультура амшқәа раартра мҩаԥысуан Картал араион агәаҿы. Ҳделегациа алахәцәа араион аҟны ихадароу амҩа ианысит, аԥсуа милаҭтә музыка арҳәо, Аԥсны абираҟқәа шьҭыхны. Аныҳәа аартра иалахәын Картал араион ахада Алтынок Иоз, насгьы Ҭырқәтәылатәи Ареспублика Апарламент адепутатцәа Халиук Коч, Енгин Иозкоч (Папба). Алтынок Иоз иааԥхьаратә қәгылараҿы иазгәеиҭеит Аԥсныи Ҭырқәтәылеи ркультуратә, рҭоурыхтә еимадарақәа рҵакы шдуу. «Ҳгәыларатә тәылақәеи ҳареи ҳаимадара аӡәгьы дзаԥырхагахом, егьырҭ атәылақәа ирхылҵшьҭроу ҳтәылауаагьы рхатәы бызшәа аҳәаразы, рҭоурыхтә ԥсадгьыл аҭааразы мап рыцәкра азин имам».

Аԥсны аганахьала дықәгылеит Аԥсны акультура аминистр Б. Гәынба. Аԥсны Адәныҟатәи аусқәа рминистрра аусзуҩ А. Асабуа даԥхьеит Адәныҟатәи аусқәа рминистр В. Чрыгба иҟаиҵаз ааԥхьара. Ааԥхьара иаҳәоит: «Аԥсны даараӡа рыхә ҳаракны иаҳшьоит Ҭырқәтәылеи ҳареи иҳабжьоу аҭоурыхтә, акультуратә еимадарақәа, гәахәаралагьы иҳадҳакылоит ҳажәларқәа реимадара арҿиара. Ҭықәтәыла иқәынхоит зҭоурыхтә ԥсадгьыл иадҳәалазарц зҭаху, абиԥара ҿыцқәагьы уи абзиабара рылазааӡо, уаҟа аԥсуа бызшәеи, аԥсуа культуреи ӡырызго хыԥхьаӡара рацәала аԥсуа диаспора».

Аԥсны акультура амшқәа Сҭамԥыл ақалақь ауааԥсыра рацәаҩны иазҿлымҳахеит.


Возврат к списку



Аԥсны иазкны

Аминистрра

Адәныҟатәи аполитика

Аконсултә дырраҭара

Аналитика

Разработка сайта: ait
АԥСНЫ АҲӘЫНҬҚАРРА АДӘНЫҞАТӘИ АУСКӘА РМИНИСТРРА E-mail: info@mfaapsny.org; Tel: +7 (840) 226-70-69; Adress:. Lakoba, 21