aps | rus | eng | tur | de | it | ar | esp | fr


Аԥсны Аҳәынҭқарра
Адәныҟатәи аусқәа рминистрра

Аимадаратә информациа:
Аҭыӡҭыԥ: 384900 Лакоба имҩа 21, ақ. Аҟәа
+7 940 996 39 48 (амоб.)
+7 840 226 39 48 (аус.)
E-mail: visa@mfaapsny.org


Гал ақалақь аҟны имҩаԥысит изаамҭанытәиу, 47-тәи аинцидентқәа раԥырҟәҟәаарази хырыҩ рыҭарази Амеханизм алахәылацәа реиԥылара
Приднестровтәи Молдавтәи Ареспублика адәныҟатәи аусқәа Рминистрра аҿы Даур Ақаҩбеи Витали Игнатиеви реиҧылара мҩаҧысит

Аԥсны Адәныҟатәи аусқәа рминистрра аусзуҩцәа изаамҭанытәиу адипломатиатә рангқәа ранашьан 16.05.2013

Аԥсны Адәныҟатәи аусқәа рминистрра аусзуҩцәа изаамҭанытәиу адипломатиатә рангқәа ранашьан

Лаҵарамза 17 рзы Аԥсны Адәныҟатәи аусқәа рминистрра аԥҵоижьҭеи 20 шықәса ҵуеит. Аиубилеи аламҭалаз адәныҟаполитикатә усбарҭа хада аусзуҩцәа изаамҭанытәиу адипломатиатә рангқәа ранашьан. Адәныҟатәи аусқәа рминистр Виачеслав Чрыгба аминистрра аусзуҩцәа дрыдныҳәалеит. «Адәныҟатәи аполитика – аҳәынҭқарра аусураҿы ихадароу ахырхарҭақәа иреиуоуп. Аибашьра анцоз аамҭазы Аԥсны раԥхьатәи Ахада Владислав Арӡынба иқәҵарала иаԥҵан адәныҟатәи аусқәа рминистрра. Усҟангьы хара иԥшуан, ирдыруан зхы иақәиҭу, ихьыԥшым ҳәынҭқарраны ҳшыҟалоз, – иҳәеит Чрыгба. – Иахьа Аԥсны аинтересқәа рӡыргареи, адәныҟаполитикатә ҩаӡараҿы ашәарҭадара аагареи аус иацызҵо шәара шәоуп», – ҳәа азгәеиҭеит иара. Зегьы ақәҿиара дуқәа рзеиӷьаишьеит рнапы злаку аҳәынҭқарратә ус аҿы. Адипломатиатә рангқәа ранашьаразы Аԥсны Ахада Александр Анқәаб иусԥҟа даԥхьеит Ахада иусбарҭа анапхгаҩы Беслан Кәыбраа.

Аԥсны адәныҟатәи аусқәа рминистрра аколлектив иаргьы дрыдныҳәалеит. «Иахьа исгәаласыршәон 20 шықәса раԥхьа имҩаԥысуаз ахҭысқәа, – иҳәеит Кәыбраа иадныҳәаларатә ажәа иалаҵаны, – ара аминистрра аԥҵара иалахәыз аԥышәа змоу адипломатцәа аус руеит. Иуадаҩыз аамҭақәа ҳашьҭахьҟа инҳажьит, адунеитә уаажәларра ҳаназхарымҵоз, ҳара иаҳгәамԥхоз, зынӡа иҳазҳадымкылоз аӡбамҭақәа анҳԥыршьуаз. Аԥсны адәныҟатәи аусқәа рминистрреи, ҳдипломатцәеи, шәара шәусзуҩцәеи есымша профессионалтә ҩаӡара ҳаракыла азҵаарақәа зегьы ирызнеиуан, ҳмилаҭтә интересқәа рыхьчон. Иахьа Адәныҟатәи аусқәа рминистрра даҽа ҭагылазаашьак аҿы аус ауеит, иаӡбо азҵаарақәагьы рҽырыԥсахит. Атәыла аиҳабыраҿы ҳара агәра ганы ҳаҟоуп аминистрра имҩаԥнагараны иҟоу афункциақәа бзианы инанагӡоит ҳәа, ус анакәха ԥхьатәи ақәҿиарақәагьы хара имгакә иаҳбарҭахоит. Иахьатәи аминистрра аусзуҩцәа 20 шықәса рыла иаԥҵаз атрадициақәа ирыцырҵалап ҳәа ҳгәы иаанагоит. Иҭабуп ҳәа шәасҳәоит қәҿиаралатәи шәусуразы. Аманшәалара шәыцзааит есымша!»

Аԥсны Ахада Александр Анқәаб иусԥҟала лаҵарамза 16, 2013 шықәсазы адәныҟатәи аусқәа рминистр ихаҭыԥуаа Олег Аршбеи Иракли Хынҭәбеи иранашьоуп Аҭакзыԥхықәу, Азинмчра нагӡа змоу Ацҳаражәҳәаҩ иранг.

Аҭакзыԥхықәу, Азинмчра нагӡа змоу Анашьҭҩы иранг 1-тәи аҩаӡара ианашьоуп Аԥсны Адәныҟатәи аусқәа рминистрра Аконсултә маҵзура аиҳабы Мартин Ҭаркьыл.

Аконсултә маҵзура аиҳабы ихаҭыԥуаҩ Лаша Аҩӡбеи, Европеи, Еиду Америкатә Штатқәеи Канадеи рыҟәша аиҳабы Артур Гагәлиеи, Урыстәылатәи Афедерациеи, СНГ атәылақәеи, Приднестровиеи, Аахыҵ Уаԥстәылеи, Ашьха-Ҟарабахтәи Ареспубликеи, Қырҭтәылеи рыҟәша аиҳабы Иракли Ҭыжәбеи иранашьуп Аҭакзыԥхықәу, Азинмчра нагӡа змоу Анашьҭҩы иранг 2-тәи аҩаӡара. Адәныҟатәи аусқәа рминистрра 20 шықәса ахыҵра инамаданы, аминистр Виачеслав Чрыгба идҵа инақәыршәаны адипломатиатә рангқәа ранашьоуп абарҭ аминистрра аусзуҩцәа:

Адгәыр Чегьиа – 1-тәи аҩаӡара змоу Абжьагаҩ, Анна Гамсаниаԥҳа – Атташе, Мадина Зыхәԥҳа – 2-тәи аҩаӡара змоу Абжьагаҩ, Ҭенгиз Ҭарба – 2-тәи аҩаӡара змоу Абжьагаҩ, Инал Лазба – Атташе. Иара убасгьы, рмаҵуратә усураҿы иаадырԥшыз алҵшәа бзиақәа рзы Адәныҟатәи аусқәа рминистрра Аҳаҭыртә шәҟәы ранашьоуп: Мадина Аҩӡԥҳа – Урыстәылатәи Афедерациаҟны Аԥсны Аҳәынҭқарра Ацҳаражәҳәарҭа Абжьагаҩ, Лаша Аҩӡба – Аконсултә маҵзура аиҳабы ихаҭыԥуаҩ, Вероника Џьопуа – Аконсултә маҵзура ареферент еиҳабы, Стелла Ҷкадуа – Аконсултә маҵзура ареферент, Артур Гагәлиа – Европеи, Еиду Америкатә Штатқәеи Канадеи рыҟәша аиҳабы, Иракли Ҭыжәба – Урыстәылатәи Афедерациеи, СНГ атәылақәеи, Приднестровиеи, Аахыҵ Уаԥстәылеи, Ашьха-Ҟарабахтәи Ареспубликеи, Қырҭтәылеи рыҟәша аиҳабы.


Возврат к списку



Аԥсны иазкны

Аминистрра

Адәныҟатәи аполитика

Аконсултә дырраҭара

Аналитика

Разработка сайта: ait
АԥСНЫ АҲӘЫНҬҚАРРА АДӘНЫҞАТӘИ АУСКӘА РМИНИСТРРА E-mail: info@mfaapsny.org; Tel: +7 (840) 226-70-69; Adress:. Lakoba, 21