aps | rus | eng | tur | de | it | ar | esp | fr


Аԥсны Аҳәынҭқарра
Адәныҟатәи аусқәа рминистрра

Аимадаратә информациа:
Аҭыӡҭыԥ: 384900 Лакоба имҩа 21, ақ. Аҟәа
+7 940 996 39 48 (амоб.)
+7 840 226 39 48 (аус.)
E-mail: visa@mfaapsny.org


Гал ақалақь аҟны имҩаԥысит изаамҭанытәиу, 47-тәи аинцидентқәа раԥырҟәҟәаарази хырыҩ рыҭарази Амеханизм алахәылацәа реиԥылара
Приднестровтәи Молдавтәи Ареспублика адәныҟатәи аусқәа Рминистрра аҿы Даур Ақаҩбеи Витали Игнатиеви реиҧылара мҩаҧысит

Аахыҵ Кавказ аҭынчреи аҭышәынтәалареи рзы 24-тәи Женеватәи аиҿцәажәарақәа рылҵшәақәа ирызку Адәныҟатәи аусқәа рминистрра ахҳәаа 30.06.2013

Аахыҵ Кавказ аҭынчреи аҭышәынтәалареи рзы 24-тәи Женеватәи аиҿцәажәарақәа рылҵшәақәа ирызку Адәныҟатәи аусқәа рминистрра ахҳәаа

Рашәарамза 25-26 рзы Женева имҩаԥысит Аахыҵ Кавказ аҭынчреи аҭышәынтәалареи рзы 24-тәи Жәларбжьаратәи Женеватәи аиҿцәажәарақәа. Евро-Еидгылеи, Еидҵоу амилаҭқәа реилазаареи, Ашәарҭадареи аусеицуреи рзы Европа иҟоу Ахеилаки рҳәаақәҵарала имҩаԥысуа аиҿцәажәарақәа ирылахәын Аԥсны, Аахыҵ Уаԥстәыла, Урыстәыла, Қырҭтәыла, Еиду Америкатә Штатқәа рҟынтә аделегациақәа. Аԥсны Адәныҟатәи аусқәа рминистр Виачеслав Чрыгба напхгара зиҭоз Аԥснытәи аделегациа иалахәын аԥсуа дипломатцәа Инар Гыцба, Лаша Аҩӡба, Кан Ҭаниа, Ҭенгиз Ҭарба.

Аилацәажәарақәа ишаԥу еиԥш ҩ-усуратә гәыԥк рҟны имҩаԥысуан – ашәарҭадара азҵаарақәеи, агуманитартә тематикеи рыла.

Ашәарҭадара агәыԥ аҟны қырҭтәылатәи аган амч ахамырхәаразы еилахәу аҳәамҭа атекст аиқәыршәара аус ааннакылеит. Қырҭтәыла ахаҭарнакцәа изакәантәым азыҳәара ҟарҵеит, адокумент ахьӡ аҿы хымԥадатәны иарбатәуп ҳәа амч ахамырхәаразы урыстәылатәи аҳәамҭахь ахьарԥш. Аԥснытәи аделегациа аиҳабы В. А. Чрыгба Аиҿцәажәарақәа рылахәцәа рахь ааԥхьара ҟаиҵеит амшхәаԥштә аҟны иҵегь азҵаарақәа шыҟоугьы, Женеватәи аиҿцәажәарақәа рхықәкы хадас иҟоу – амч ахамырхәаразы азинтә шьаҭа змоу аиқәшаҳаҭра адкылара шакәу рхадмыршҭларц.

Аԥснытәи аделегациа аиҳабы иазгәеиҭеит аԥснытәи аган Қырҭтәыла аделегациа алахәцәа зегьы қырҭтәылатәи аган аазырԥшуа раҳасабала ишрыхәаԥшуа. Аԥсназы акагь аанагаӡом урҭ рхы ишашьҭоу: уи қырҭтәылатәи аган аҩныҵҟатәи аус ауп.

В. А. Чрыгба гәахәарала иазгәеиҭеит жәларбжьаратәи анаԥшцәа Аԥсныи Қырҭтәылеи рҳәааҿы ашәарҭадаратә ҭагылазаашьа еиӷьхеит ҳәа ахәшьара шыҟарҵаз, уи аиӷьхара зыбзоуроу Аԥсны ахадара имҩаԥыргаз аус шьардақәа шракәу. Иациҵеит иара убасгьы Гал араион аҟны қырҭтәылатәи амаҵзура ҷыдақәа рдиверсиақәа рхыԥхьаӡара ишагхаз. Убри аамҭазы аминистр изинтәым ҳәа иԥхьаӡоит Аԥсныи Қырҭтәылеи рҳәаа хақәиҭрала ахысра апроблема ақәыргылара ахаҭа, насгьы уи аҳәаа арӷәӷәара «гәҭыхас амазаара».

Иазгәаҭан аҳәынҭқарратә ҳәаа ахысреи, уи арӷәӷәареи, аус адулареи Аԥсны Аҳәынҭқаррра мацара иаӡбаша зҵаарақәаны ишыҟоу.

В. А. Чрыгба ҩ-ганклатәи аиқәшаҳаҭра ацымхәарас алахәцәа зегьы ганклатәи рҳәамҭақәа реизакра ауеит ҳәа аицхантәаҩцәа ирыдыргало альтернатива аганахьала агәҩарақәа шимоу ааирԥшит. «Аԥсны Аҳәынҭқарреи Аахыҵ Уаԥстәылеи рҟны ирымоу аполитикатә проблемақәа рыӡбаразы Қырҭтәыла иаднакыло ганклатәи аҳәамҭақәа рыгәрагара ҳгәы иҭам, амч ахамырхәаразы жәларбжьара-зинтә гарантиақәеи, ҩ-ганклатәи аиқәшаҳаҭрақәеи рыла ишьақәырӷәӷәамзар. Қырҭтәыла изныкымкәа иҳақәлахьеит, убри азхәан уажә иаалырҟьаны аҭынчра азықәԥаҩцәас иҟалеит ҳәа агәра ҳазгом. Ҳара ҳзы аҭынчра агарантиас иҟоу ҳарбџьар мчқәеи Урыстәылеи ҳареи иҳабжьаҳҵаз арратә еиқәшаҳаҭрақәеи роуп. Аха ус ишыҟоугьы Қырҭтәылеи ҳареи ҳабжьара жәларбжьаратәи агарантиақәа зцу амч ахамырхәаразы аиқәшаҳаҭра адкылара – раԥхьатәи шьаҿахон ҳтәылақәа рыбжьара агәрагара архынҳәра аус аҿы. Убри азы мацароуп Женеватәи аиҿцәажәарақәа ҳазрылахәугьы», – ҳәа азгәеиҭеит В. А. Чрыгба.

Аԥснытәи аган ақәыӡбеит Қырҭтәыла ирыднагалаз, анаҩс Еидҵоу амилаҭқәа реилазаара Ассамблеиа Хада 57-тәи асессиаҿы аделегациақәа акыр зықәшаҳаҭхаз ахҵәацәа рзы ақәҵара, уаҟа арегион аҟны иҟоу аполитикатәи, агуманитартә ҭагылазаашьа даара еицакуп. Аҳәамҭаҿы иарбан Аԥсныи Аахыҵ Уаԥстәылеи аламырхәӡакәа, урҭ ргәаанагара аҳәаразы азин рымҭаӡакәа, ақәҵара адкылара иаанаго Женеватәи аиҿцәажәарақәа реиҵарҟьара ауп ҳәа. Аԥснытәи аделегациа ҩаԥхьа америкатәи аган ахь азыҳәара ҟанаҵеит Еидҵоу амилаҭқәа реилазаара Ассамблеиа Хада аҿы Аԥсны аинтересқәа зныԥшуа ақәҵарақәа рылацәажәараан ахалархәразы ԥырхага рынамҭарц. Иазгәаҭан иара убас қырттәылатәи адәныҟатәи аусқәа рминистр ари ақәҵара аӡыргаразы имчи илшареи дшырмеигӡазгьы, даҽа ҩ-тәылак мацара роуп қырҭтәылатәи адипломатцәа уи иақәдыршаҳаҭыз. Убри аан ақәҵара иаҿагыланы зыбжьы зҭииз атәылақәа рхыԥхьаӡара иацлеит. Қырҭтәылатәи ақәҵара адгылара ӷәӷәа ахьамоуз зыбзоуроу афакторқәа иреиуоуп Урыстәылатәи Афедерациа ацхыраарала Ассамблеиа Хада аофициалтә документ аҳасабала аделегациақәа ирзынархаз ганклатәи ақәҵара азы рыбжьы рымҭиирц, ма ирыдрымкыларц зҳәоз Аԥсны Адәныҟатәи аусқәа рминистрра ааԥхьара.

Аԥснытәи аган гәалсрала иазгәарҭоит Қырҭтәылатәи аделегациа уаҩы еиликааратәы иахьырзымҳәаз, Аԥсныи Аахыҵ Уаԥстәылеи рделегациақәа рыдагьы, дара аицхантәаҩцәа рхаҭақәа ирыдыргало аиҿцәажәарақәа рымҩаԥгара апарадигма ҿыц аҽалархәра иаахҵәаны мап зацәыркыз амзыз. Қырҭтәылатәи алахәцәа ргәамҵра убаратәы иҟан, уи зыхҟьазгьы аинааларазы изаҟаразаалак шьаҿак ҟарҵар, уажәыгьы Қырҭтәыла амчраҿы иҟоу Саакашьвили «ихьшқәа» «амилаҭтә интересқәа рыԥсахра» аҳасабала иршьар ҳәа ирымоу ашәароуп. Абрҭқәа ирыхҟьаны Женеватәи аиҿцәажәарақәа ираамҭанымкәа заа ихыркәшахеит.

Аԥснытәи аган Аиҿцәажәарақәа реицхантәаҩцәа рахь аҳәара ҟанаҵеит аинраалара алыршаразы рымчқәа зегь ԥыршәарц, қырҭтәылатәи аган иаҳәо аҟны иаанымгыларц. Аиҿцәажәарақәа рылахәцәа зегьы аконструктивтә шьаҭала аусура иазхиазар, қырҭтәылатәи аган мацароуп уажә уи иаҿагыланы иҟоу. Иҿыцу апарадигма ашьаҭала аусура қырҭтәылатәи аделегациа ақәшаҳаҭхаратәы аицхантәаҩцәа ианырзыҟамҵа, Аԥсны аделегациа анаҩстәи Женеватәи аиҿцәажәарақәа рылахәхара ианымԥшыр залшом. Қарҭ аиҭашәарақәа ирыхҟьаны зҵакы дуу жәларбжьаратәи Женеватәи аиҿцәажәарақәа рфорум аԥыххар, уи азыҳәан аҭакԥхықәра здыло қырҭтәылатәи аган акәхоит.


Возврат к списку



Аԥсны иазкны

Аминистрра

Адәныҟатәи аполитика

Аконсултә дырраҭара

Аналитика

Разработка сайта: ait
АԥСНЫ АҲӘЫНҬҚАРРА АДӘНЫҞАТӘИ АУСКӘА РМИНИСТРРА E-mail: info@mfaapsny.org; Tel: +7 (840) 226-70-69; Adress:. Lakoba, 21