aps | rus | eng | tur | de | it | ar | esp | fr


Аԥсны Аҳәынҭқарра
Адәныҟатәи аусқәа рминистрра

Аимадаратә информациа:
Аҭыӡҭыԥ: 384900 Лакоба имҩа 21, ақ. Аҟәа
+7 940 996 39 48 (амоб.)
+7 840 226 39 48 (аус.)
E-mail: visa@mfaapsny.org


Гал ақалақь аҟны имҩаԥысит изаамҭанытәиу, 47-тәи аинцидентқәа раԥырҟәҟәаарази хырыҩ рыҭарази Амеханизм алахәылацәа реиԥылара
Приднестровтәи Молдавтәи Ареспублика адәныҟатәи аусқәа Рминистрра аҿы Даур Ақаҩбеи Витали Игнатиеви реиҧылара мҩаҧысит

12.07.2013

Аԥсны Адәныҟатәи аусқәа рминистрраҿы апресс-конференциа мҩаԥысит

Апресс конференциа рызкын Женеватәи аиҿцәажәарақәа рылҵшәақәеи, Аԥсны Адәныҟатәи аусқәа рминистр Виачеслав Андре-иԥа Чрыгба напхгара зиҭоз Аминистрра аделегациа Италиеи, Ареспублика Сан-Маринои рҭаара амҩаԥысшьеи. Иазааҭгылеит иара убас Сириа-арабтәылатәи Ареспублика аҟынтә ҳаицтәылауаа рҭоурыхтә ԥсадгьыл ахь рырхынҳәра апроцесс ацашьа. Апресс-конференциа рхы аладырхәит Адәныҟатәи аусқәа рминистр Виачеслав Чрыгба, аминистр ихаҭыԥуаҩ Иракли Хынҭәба, Аҭоурыхтә ԥсадгьыл ахь архынҳәразы Аҳәынҭқарратә еилакы ахантәаҩы ихаҭыԥуаҩ Инар Гыцба, адипломатцәа Лаша Аҩӡба, Кан Ҭаниа.

Виачеслав Чрыгба иажәақәа рыла, аиҿцәажәарақәа реицхантәаҩцәа даара аџьабаа рбеит Аԥснытәи аган ирыднагалаз аформат азы акомпромисс аԥшаара аус аҿы. Қырҭтәылатәи аган ада егьырҭ зегьы ақәшаҳаҭхеит ари аформат ҿыц. «Ҳара ирыдаҳгалеит шьыбжьаанӡа ҩ-усуратә гәԥк рҟны аусура – ашәарҭадареи агуманитартә зҵаарақәеи рзы, шьыбжьышьҭахь – азеиԥш делегациақәа зегьы еизаларц, аха Қырҭтәылатәи аделегациа ари ажәалагала иақәымшаҳаҭхеит, изақәымшаҳаҭхаз амзызқәа мҳәаӡакәа – иҳәеит Чрыгба. – Убри иахҟьаны ҳаиҿцәажәарақәа заа ихыркәшахеит, амшхәаԥштә аҿы иарбаз азҵаарақәа зегьыҵәҟьа рылацәажәара ҳахьымӡаӡеит».

«Қырҭтәыла апозициа деструктивтәуп, анаҩстәи аиԥылараангьы абас рхы мҩаԥыргар, Женеватәи аиҿцәажәарақәа уи ала ихыркәшахеит ауп иаанаго», – ҳәа азгәеиҭеит аминистр. – Аԥснытәи Аахыҵ Уаԥстәылатәи аделегациақәа аицхантәаҩцәа ирарҳәеит ажәытәтәи аформат ахь ахынҳәра ргәы ишҭам. Убри аҟнытә иааиуа аиҿцәажәарақәа рҟны еилкаахоит урҭ уаҳа ҳхы рылаҳархәуа ирылаҳмырхәуа. Аҳәоуеқәшәара ҳмоур аиҿцәажәарақәа аанкылахоит ауп, аха уигьы трагедиа дуны иҟаӡам. Избан акәзар уи ашьҭахь аформат ҿыцқәа рзы аилацәажәарақәа мҩаԥаҳгалар ҳалшоит, уаҟа Аԥсны ахатә ԥҟарақәа рыла аиҿцәажәара рымҩаԥгара ада ҽакы ишақәшаҳҭым аҳәара алшоит. Ҳаԥшып, цәыббрамзазы аицхантәаҩцәа жәабжьыс иаҳзаарго».

Адәныҟатәи аусқәа рминистр иазгәеиҭеит Аԥснытәи аделегациа, хаҭалагьы уи аиҳабы, аиҿцәажәарақәа ралагамҭаз ишырҳәаз қырҭтәылатәи алахәцәа зегьы қырҭтәыла ахаҭарнакцәа раҳасабала мацара ишрыхәаԥшуа, дара рхы ишашьҭазаалакгьы – иҟам-ианым, иқәцоу аԥснытәи аиҳабыра ахаҭарнакцәа ҳәа акәзаргьы. «Уи ҳара ҳус иалаӡам, уи дара рус оуп. Ирҭахызар, китаитәи императорцәас рхы иашьҭазааит. Ҳара ҳзыҳәан – урҭ Қырҭтәылатәи аделегациа ауп, урҭ Қырҭтәыла иахаҭарнакцәоуп. Уи азҵаара уаҳа иахыуҳәааша акгьы ыҟам», – иҳәеит В. Чрыгба.

Иара иажәақәа рыла, иқәцоу Аԥсны аиҳабыра ахаҭарнакцәа ҳәа зхы иашьҭоу ауаа 2008 шықәса инаркны аханатә аиҿцәажәарақәа ирылахәуп. «Усҟангьы иаҳҳәеит, иахьагьы аҳәара ҳаҿуп ҳара ҳзы урҭ Қырҭтәыла ахаҭарнакцәаны ишыҟоу. Аха дара аиҿцәажәарақәа рцашьа иахәаԥшуеит, иӡырҩуеит ауп, рхаҭақәа жәалагалак ҟарҵо, зынӡа ицәажәо иҳамбаӡацт. Убри аҟнытә дара рыҟазаара ҳара ҳзы акымзарак аҵанакӡом», – иҳәеит Адәныҟатәи аусқәа рминитср.

Виачеслав Чрыгба дазааҭгылеит иара убас Италеи Ареспублика Сан-Маринои рҭаара шымҩаԥысыз.

«Италеиеи ҳареи акыршықәса ҳаимадоуп. Рим ақалақь аҟны апресс-конференциа мҩаԥаагахьеит, италиатәи апарламент адепутатцәеи асенаторцәеи ҳарԥылахьеит. Италиатәи аполитикцәеи, ауаажәларратә усзуҩцәеи, ажурналистцәеи ҳареи ҳдиалог ԥымкрада амҩаԥгара ҳашьҭоуп, избан акәзар ари даараӡа аинтерес зцу тәылоуп аимадаразы», – иҳәеит Чрыгба. – Италиатәи абизнесуаа Аԥсны азы аинтерес ду рымоуп, еиҳаракгьы аинвестициақәеи, акурортқәеи рганахьала. Аекологиатә ԥсшьареи ақыҭанхамҩеи рахь азҿлымҳара аазырԥшыз римтәи абизнесуаа гәыԥҩыки ҳареи аиԥылара ҳаман».

Пезаро ақалақь аҟны Чрыгба ипресс-конференциа мҩаԥысит. Италиатәи амилаҭтә радио аинтервиугьы аиҭеит. Пезаро ахадара адепутатцзәа гәыԥҩык Италиа аиҳабыреи Адәныҟатәи аусқәа рминистрреи рахь ааԥхьара шәҟәы рышьҭит Аԥсны Аҳәынҭқарреи Аахыҵ Уаԥстәылеи рхьыԥшымра азхарҵарц. Мраҭашәаратәи атәылақәа рҟны Аԥсныи Аахыҵ Уаԥстәылеи рхьыԥшымра азхаҵара аганахьала аинициативақәа рцәырҵра, аимак-аиҿак ахьымҩаԥысуа даара акраҵанакуеит. Ари ԥхьацарамҩоуп, Италиа еиуеиԥшым ауааи ҳареи ҳаимадара иабзоуроуп ҳәа сгәы иаанагоит», – иҳәеит аминистр.

Пезаро ашьҭахь Аԥсны Адәныҟатәи аусқәа рминистрра аделегациа ареспублика Сан-Марино иаҭааит. «Арри атәыла апарламент адепутатцәеи, ажурналистцәеи, ауаажәларратә усзуҩцәеи ҳареи аимадара бзиақәа ҳабжьоуп. Сан-Марино иреиҳаӡоу аоппозициатә партиа - Асоциалисттә партиа ахантәаҩы ҳареи ҳаиԥылара мҩаԥысит. Егьырҭ апартиақәа рхаҭарнакцәагьы ҳарԥылеит, амчра знапаҿы иҟоу апартиагьы уахь иналаҵаны», – азгәеиҭеит В. Чргыба.

Аминистр ажәахә иманы дықәгылеит Кавказ аҭынчра аагара иазкыз аконференциаҿы.

«Сан-Маринои ҳареи ҳаизыҟазаашьақәа еиҳа иҭбаахеит ари аҭаара ашьҭахь, ҳтәылахь ирымаз аинтерес еиҳагьы идухеит. Сан-Марино ҳусура иацаҳҵалароуп ҳәа сгәы иаанагоит, –иҳәеит аминистр. – Ари аусура ҳара ҳзы иаҵанакуа рацәоуп, избан акәзар ари атәыла Евро-Еидгыла иалаӡам, убри аҟнытә ахала аӡбамҭақәа аднакылар алшоит. Европатәи атәылақәаа зегь раԥхьа Сан-Марино ауп Китаитәи Жәлар Рреспублика ахьыԥшымра азхазҵаз. Ари атәыла аполитикатә мчрақәа згьы иахьынӡауа ҳрымадазароуп, ҳара уи ҳазыҟаҵоуп».

Уи адагьы Аԥснытәи аделегациа Сан-Марино раҭаара апрессаҿы аинтерес ду цәырнагеит. Атәылаҿы ихадароу агазеҭкәа аԥхьатәи адаҟьақәа рҿы ианылеит Аԥсны иазку аматериалқәа, уи иаҵанакуа рацәоуп.

Иракли Хынҭәба арепатриациа апроцесс ацашьа инарҭбааны дазааҭгылеит.

«Иазгәасҭарц сҭахуп, аҳәынҭқарра ахадеи аԥыза-министри ҳҿаԥхьа иқәдыргылаз адҵа шынагӡоу. Иахьа шьҭа иаҳҳәарц ҳалшоит сириатәи апрограмма қәҿиарала ахыркәшарахь ҳашнеиуа», – иҳәеит Хынҭәба. Убри аан адипломат иазгәеиҭеит аиҳабыра уи аҿы аангылара ргәы ишҭам, Сириантә Аԥсныҟа аара зҭаху даҽа гәыԥҩык ауаа ыҟоуп.

«уажәазы зегь реиҳа ихадароу – иааз ҳашьцәа радаптациа аус ауп. Аҭоурыхтә ԥсадгьыл ахь архынҳәразы аилак уи аганахьала иааиԥмырҟьаӡакәа аусура иаҿуп», – иҳәеит Хынҭәба.

Иара иазгәеиҭеит Сириа агуманитартә ҭагылазаашьа еиҳа-еиҳа ишеицәахо. Иахьазы Сириантә ахҵәацәа рхыԥхьаӡара 1 761-ҩык рҟынӡа инаӡоит. Хынҭәба иазгәеиҭеит аҳәаанырцә инхо ҳашьцәа рлахьынҵа гәымбылџьабарала азнеира шҳалымшоз. «Арепатрициала Аԥсны аҭоурыхтә иашара ашьақәыргылара адагьы, жәларбжьаратәи азин ирыднаҵо аҭакԥхықәрагьы нанагӡоит», – иҳәеит иара.

Адәныҟатәи аусқәа рминистрреи Арепатриациазы аҳәынҭқарратә еилаки русзуҩцәа рымчқәа еибыҭаны ҳашьцә рҭорыхтә ԥсадгьыл ахь раагара апроцесс еиҿыркаауан. «Ари аиашазы даараӡа имариам усуп. Ҳастратегитә партниор – Урыстәылатәи Афедерациа ацхыраарада уи амҩаԥгара залмыршахар ҟаларын», – ҳәа азгәеиҭеит Иракли Хынҭәба.

Шәачатәи аолимпиада аҽазыҟаҵара анымҩаԥысуа, ашәарҭадаратә ҭагылазаашьа ахылаԥшра ду анамоу аамҭазы ачартертә реис ала ауаа рацәа раагара – даараӡа залыршара уадаҩу усуп ҳәа азгәеиҭеит Хынҭәба. Урыстәылатәи ҳколлегацәа ҩызаҵас еиԥшҵәҟьа рхы аадырԥшит. «Ҳаҳәарақәа акызаҵәыкгьы аҭакда иаанымхеит. Зыӡбара аамҭа рацәа аҭаху азҵаарақәа, ҳара ҳаимадарақәа ирыбзоураны мышкала иӡбахон», – иҳәеит Хынҭәба. «Росавиациа», Афедералтә шәарҭадаратә маҵзура, урыстәылатәи аҳәаахьчацәа уҳәа аԥснытәи аусбарҭақәеи дареи ҳәоуеиқәшәарала аус руит.

И. Хынҭәба иазгәеиҭеит Сириантәи ҳашьцәа қәҿиарала рҭорыхтә ԥсадгьыл ахь раагара Аԥсны аҿагылаҩцәа – Қырҭтәылеи егьырҭ тәылақәаки, шаргәамҵуа. Еидҵоу амилаҭқәа реилазаара амаӡаныҟәгаҩ хада лаҵарамзазы иҟаиҵаз ажәахә аҟынтә ацитата ааигеит, асҟаҩык ауаааԥсыра рацәа Аԥсныҟа раагара «мчылатәи арепатриациазы» жәларбжьара-зинтә принцип иақәшәозароуп ҳәа. Аминистр ихаҭыԥуаҩ ари агәаанагара ҵакыдароуп ҳәа иԥхьаӡоуп. И. Хынҭәба игәаанагарала Аԥсны амчи аӷәӷәареи ахьаанарԥшуа, адемографиатә ҭагылзаашьа ахьеиӷьнатәуа ауп ҩызарала иахзыҟам атәылақәа зыргәамҵуа.

Иракли Хынҭәба излаиԥхьаӡо ала, Сириатәи ҳашьцәа рҭоурыхтә ԥсадгьыл ахь раагара аганахьала иарбанзаалак алахәаахәҭрақәа риашашьа шрымам. «Сириатәи ҳашьцәа раагаразы апрограмма аиԥш зеиԥшу Аԥсны аибашьра ашьҭахьтәи аҭоурых аҿы иҟамлаӡацызт», – азгәеиҭеит иара.

Иахьазы Сириантә Аԥсныҟа иаахьеит 467-ҩык ҳаицтәылауаа – ҳәа адырра ҟаиҵеит Аҭоурыхтә ԥсадгьыл ахь архынҳәразы аҳәынҭқарратә еилакы ахантәаҩы ихаҭыԥуаҩ Инар Гыцба. Зынӡа 143 ҭаацәара хынҳәит. 115-ҩык ахацәа, 201 аҳәса, ахәыҷқәа – 107-ҩык, атәанчаҩцәа 44-ҩык.

Инар Гыцба иазгәеиҭеит уажәазы арепатриантцәа иаарласны аратәи аԥсҭазаара ралархәразы апрограмма аусура ишаҿу. Ари апроцесс иалахәуп араионқәа рхадацәа. Ауааԥсыра анхарҭақәа рыҭареи аусурҭаҭыԥқәа рзыԥшаареи азҵаарақәа рыӡбара мҩаԥысуеит.

Арепатриантцәа рхыԥхьаӡараҿы иҟоуп еиуеиԥшым азанааҭқәа змоу ауааԥсыра. Инар Гыцба иҟаиҵаз аинформациа ала, 45-ҩык ахацәа аусура иалагахьеит, еиҳаракгьы аргыларатә наплкқәа рҿы. Амодақәа рыҩны «Модатекс» аҟны аус зуа адизаинер дыҟоуп, аилахәырақәа «А-мобиал», «Аҟәафон» рҿы аус зуа апрограммистцәа. Аҟәатәи ауараш зауад аҟны аусура далагеит уи азанааҭ здыруа аспециалист. Абжьы арежиссиорцәеи асцена аусзуҩцәеи аԥсуеи аурыс театрқәеи, Аԥсуа тлехәаԥшреи рҟны аусура иалагеит. Аԥсны Адәныҟатәи аусқәа рминистрраҿы аус иуеит аминистрра аофициалтә саит араб бызшәала аус адызуло апрограммист. Сириантә иааз ҳашьцәа рхыԥхьаӡараҿы иҟоуп амедицина аусзуҩцәа, амашьына-ныҟәцаҩцәа, егьырҭ азанааҭуаа. Урҭ реиҳараҩык Аҟәа, Дранда, Гәдоуҭатәи араион аҟны анхарҭа ҭыԥқәа рзылхуп.

Ԥхынгәымза алагамҭаз иааз арепатриантцәа аамҭала асасааирҭа «Черноморец» аҟны иаангылеит. Урҭ рынхара иадҳәалоу аныхтәқәа зегьы аҳәынҭқарра ахахьы иагеит.

Арепатриантцәа рзы еиҿкаауп аԥсуа бызшәеи аурысшәеи рҵаразы абызшәатә курсқәа.


Возврат к списку



Аԥсны иазкны

Аминистрра

Адәныҟатәи аполитика

Аконсултә дырраҭара

Аналитика

Разработка сайта: ait
АԥСНЫ АҲӘЫНҬҚАРРА АДӘНЫҞАТӘИ АУСКӘА РМИНИСТРРА E-mail: info@mfaapsny.org; Tel: +7 (840) 226-70-69; Adress:. Lakoba, 21