aps | rus | eng | tur | de | it | ar | esp | fr


Аԥсны Аҳәынҭқарра
Адәныҟатәи аусқәа рминистрра

Аимадаратә информациа:
Аҭыӡҭыԥ: 384900 Лакоба имҩа 21, ақ. Аҟәа
+7 940 996 39 48 (амоб.)
+7 840 226 39 48 (аус.)
E-mail: visa@mfaapsny.org


Гал ақалақь аҟны имҩаԥысит изаамҭанытәиу, 47-тәи аинцидентқәа раԥырҟәҟәаарази хырыҩ рыҭарази Амеханизм алахәылацәа реиԥылара
Приднестровтәи Молдавтәи Ареспублика адәныҟатәи аусқәа Рминистрра аҿы Даур Ақаҩбеи Витали Игнатиеви реиҧылара мҩаҧысит

Женеватәи адискуссиақәа а-27-тәи рраунд аихшьалақәа рганахьала Қырҭтәыла Адәныҟатәи аусқәа рминистрра иҟанаҵаз  Аҳәамҭа иаҭоу Урыстәылатәи Афедерациа Акьыԥхьи аинформациеи рдепартамент акомментариақәа 04.04.2014

Женеватәи адискуссиақәа а-27-тәи рраунд аихшьалақәа рганахьала Қырҭтәыла Адәныҟатәи аусқәа рминистрра иҟанаҵаз Аҳәамҭа иаҭоу Урыстәылатәи Афедерациа Акьыԥхьи аинформациеи рдепартамент акомментариақәа

Қырҭтәыла Адәныҟатәи аусқәа рминистрра иҟанаҵаз Аҳәамҭаҟны ииашамкәа ирыхцәажәоуп ааигәа ихыркәшаз Женеватәи адискуссиақәа а-27-тәи раунд аихшьалақәа. Убри инадҳәаланы иахәҭаны иҳаԥхьаӡоит уаанӡа икьыԥхьыз аинформациа харҭәаауа имҩаԥысуаз аиҿцәажәарақәа реихшьалақәа рганахьала еиҳа инарҭбаау аинформациа аҟаҵара.

Ҳалагап алахәылацәа реилазаарала. Женеватәи адискуссиақәа уажәтәи рымҩаԥысраангьы, уаанӡеиԥш еиҟароу азиншьаҭақәа рыманы иалахәын Аԥсни, Қырҭтәылеи, Урыстәылатәи Афедерациеи, Еиду Америкатәи Аштатқәеи Аахыҵ Уаԥстәылеи рделегациақәа. Еицеиқәышаҳаҭрала ахантәаҩра еицымҩаԥыргон ООН, ОБСЕ, Евросоиуз рхаҭарнакцәа. Абасеиԥш иҟаз аформат шьақәыргылан Женеватәи адискуссиақәа рхацыркраан, иахьа уажәраанӡагьы ԥсахра амамкәаны иҟоуп. Қырҭтәыла Адәныҟатәи аусқәа рминистрра «Уаанӡатәи Аахыҵ Уаԥстәылатәи Автономтә област Аамҭалатәи администрациа Ахада», «Аԥсны Автономтә республика Аиҳабыра Ахантәаҩы» ҳәа зыӡбахә рҳәо ақырҭуа делегациа алахәылацәақәак рвиртуалтә «титулқәа» ракәны иазаҳаԥхьаӡоит.

Актәи агәыԥ (ашәарҭадара азҵаарақәа ирылацәажәо) аусура атәы еиҭаҳәо Қырҭтәыла Адәныҟатәи аусқәа рминистрра инарҵауланы ирылацәажәоит иара ахаҭарнакцәа иқәдыргылоз азҵаарақәеи аҽԥныҳәарақәеи. Иара убри аамҭазы ирықәҿырҭуам арҭ азҵаарақәа ҵаҵӷәыркны аԥсуеи, аурыси, аахыҵ уаԥстәылатәии аганқәа ишаҿаԥырҽуаз. «Шәачатәи аолимпиада ашьҭахь аҳәааҟны ақәыц аанда ықәырҵараны иҟоуп» ҳәа иҳәоу акәзар – провокациатә хыҭҳәаауп ҳәа иазаҳаԥхьаӡоит.

Ииашаҵәҟьаны, аҳәаақәа рҟны иахәҭаны иҟаз аусурақәа зегьы Шәачатәи аолимпиада иалагаанӡа инагӡан Аԥсни Аахыҵ Уаԥстәылеи Урыстәылеи еицышьақәдырӷәӷәахьаз аплан инақәыршәаны. Иазгәаҭатәуп аҳәаа арӷәӷәара ашьҭахь араҟа ацәгьоурақәа акыр ишеиҵахаз. Адискуссиақәа рлахәылацәа зегьы еицҿакны, ахантәаҩцәагьы абрахь иналаҵаны, иеицазгәарҭеит ақырҭуа-аԥсуеи ақырҭуа-аахыҵ уаԥстәылатәии аҳәаақәа рҟны иҟоу аҭынчреи аҭышәынтәалареи. Ари ас шакәуу ҳнарбоит иҟоу астатистикагьы: аҵыхәтәантәи ԥшьымз рыҩныҵҟа ақырҭуа-аԥсуа ҳәаа иахысит 200 000-ҩык, ақырҭуа-аахыҵ уаԥстәылатәи аҳәаа – 50 000-ҩык.

Ақырҭуа ган урыстәылатәи аган ахь иҟанаҵо аҽыԥныҳәақәа раан еснагь изызхьаԥшуа «2008ш., нанҳәа 12 рзтәи Аибашьра аанкыларазы Аиқәшаҳаҭра» акәзар еиқәтәа-еиқәгыларак аныԥшуа иҟам. Ҳара уаанӡагьы иазгәаҳҭахьан асеиԥш документк аԥсабараҟны ишыҟам. Иҟалап урҭ зыӡбахә рымоу Д. Медведеви Н. Саркози рнапы зҵарҩыз «Аконфликтқәа рҭышәныртәалара ф-принципк рыплан» акәзар. Ус акәзаргьы, ҳқырҭуа коллегацәа ари адокумент иамыԥхьац ҳәа агәаанагара ыҟоуп.

Уаанӡатәи араундқәа рҟны еиԥш а-27-тәи араунд аҟынгьы амч ахамырхәароуп изҵаара хаданы иқәгылаз. Ишәгәалаҳаршәоит ақырҭуа ган шакәу ҭакԥхықәра рызҭараны иҟоу адокументқәа анапаҵаҩра мап ацәызкуа. Аԥсни Аахыҵ Уаԥстәылеи рзы ари азҵаара аҵакы дуӡӡоуп, урҭ акыр шықәса аекономикатә ҭахкаареи Қырҭтәыл аганахьала амчратә қәыӷәӷәареи ирыҵагылоуп. Иџьашьатәума нас Қарҭаа иҟарҵо аҳәамҭақәа урҭ рыгәра ахьырымго.

Ари аганахьала Қырҭтәыла ԥхьаҟа шьаҿак аҟаҵара гәҭакны ишамамыз баны, Урыстәыла, 2012 шықәсазы ирыдыргалеит Женеватәи адискуссиақәа рлахәылацәа зегьы амчра ахамырхәаразы иаку адокумент аҳәамҭа еицыҟарҵарц, Аха ари адокументгьы а-27-тәи араунд аусураан инагӡаны мап ацәкымкәа, ақырҭуа делегациа, ахәшьара аларҟәра рҽазыршәон,. Иара убри аамҭазы иазгәарҭон Урыстәыла ганкы мацарала Қырҭтәыла аганахьала амчра ахамырхәаразы ахыдҵақәа агар шакәуу иԥыжәараны иҟоу. Ҳәарада ари ҵакыдоуп ҳәа иазаҳаԥхьаӡоит. Иагьыргәалаҳаршәоит Урыстәыла шакәым 2008 шықәса рзы аҭакԥхықәрақәа зегьы еилаганы аибашьра хацзыркыз. Иахьазы Х. Телиавини напхгара зылҭоз акомиссиа иҟанаҵаз ажәахә аҟны аибашьра хацзыркыз Қырҭтәыла аиҳабыра шракәу шьақәырӷәӷәоуп.

Аҩбатәи агәыԥ аусураҟны аԥсуа ган алацәажәон амилаҭтә культуратә ҭынхақәеи архивтә материалқәеи рырхынҳәра, иара убасгьы аԥсуа милаҭ рганахьала аҳәаанырцәтәи атәылақәа рҟны иаԥырҵо апроблемақәеи аҵаратә документқәа разхамҵареи.

Иааидкыланы, Қырҭтәылатәи Адәныҟатәи аусқәа рминистрра «аҳасабырба» ишаҳәо акәымкәа аиԥылара мҩаԥысит иҭынчу атмосфера аманы. Агәрагьы аагоит арегион аҟны аҭынчреи аҭышәынтәалареи илагала дуны ирзыҟалеит ҳәа. Ҳара, асеиԥш иҟоу аихшьаалақәа ҳрыдгылаҩцәоп.

2014 шықәса, мшаԥымза 4


Возврат к списку



Аԥсны иазкны

Аминистрра

Адәныҟатәи аполитика

Аконсултә дырраҭара

Аналитика

Разработка сайта: ait
АԥСНЫ АҲӘЫНҬҚАРРА АДӘНЫҞАТӘИ АУСКӘА РМИНИСТРРА E-mail: info@mfaapsny.org; Tel: +7 (840) 226-70-69; Adress:. Lakoba, 21