aps | rus | eng | tur | de | it | ar | esp | fr


Аԥсны Аҳәынҭқарра
Адәныҟатәи аусқәа рминистрра

Аимадаратә информациа:
Аҭыӡҭыԥ: 384900 Лакоба имҩа 21, ақ. Аҟәа
+7 940 996 39 48 (амоб.)
+7 840 226 39 48 (аус.)
E-mail: visa@mfaapsny.org


Гал ақалақь аҟны имҩаԥысит изаамҭанытәиу, 47-тәи аинцидентқәа раԥырҟәҟәаарази хырыҩ рыҭарази Амеханизм алахәылацәа реиԥылара
Приднестровтәи Молдавтәи Ареспублика адәныҟатәи аусқәа Рминистрра аҿы Даур Ақаҩбеи Витали Игнатиеви реиҧылара мҩаҧысит

Аԥсны Аҳәынҭқарра Адәныҟатәи аусқәа рминистр ихаҭыԥуаҩ Ираклии   Хынҭәба Аҟәеи Евросоиузи Аиқәшаҳаҭра рнапы заҵармыҩуеи Украина   иҟоу аҭагылазаашьази… 22.04.2014

Аԥсны Аҳәынҭқарра Адәныҟатәи аусқәа рминистр ихаҭыԥуаҩ Ираклии Хынҭәба Аҟәеи Евросоиузи Аиқәшаҳаҭра рнапы заҵармыҩуеи Украина иҟоу аҭагылазаашьази…

Аԥсны Аҳәынҭқарра Адәныҟатәи аусқәа рминистр ихаҭыԥуаҩ Ираклии Хынҭәба «Известиа» аредакциа иеиҭаз аинтервиу аҟны далацәажәоит хәҭакала иазхаҵоу аҳәынҭқаррақәа ргеополитикатә ҭагылазаашьеи, Аԥсни Евросоиузи реизыҟазаашьеи, лассы имҩаԥысран иҟоу адипломат ҿарацәа рфоруми, ақырҭуа-аԥсуа еизыҟазаашьақәеи.

–Адунеи аҟны имҩаԥысуа адискуссиақәа рхалархәра ззалмыршо хәҭакахьала иазхаҵо аҳәынҭқаррақәа иахьа рольс инарыгӡозеи?

–Иахьазы, иазхаҵам мамзаргьы азхаҵара амҩы иану аҳәынҭқаррақәа адунеижәларбжьаратәи арегионалтәи политикаҟны зхала иқәгыло ракәны иҟоуп. Иаҳҳәап, Таивань, зтехнологиа ҳараку аҿиара аусхк аҟны иарбанызаалак европатәи ҳәынҭқаррак иеицәамкәа иҟоуп. Приднестровие акәзар, аекономикатә ҿиареи иамоу аресурстә потенциали рыла Молдова акыр иаԥнагоит. Аԥсны атәы ҳалацәажәозар, зегьы еицырдыруеит иамоу агеостратегиатә ҵаки зҳәазҵам аекономикатә потенциали. Аахыҵ Кавказ ашәарҭадареи аҭышәынтәалареи, атранспорт инфраструктура аҿиареи рызҵаара Аԥсны алахәымкәа аӡбра уадаҩны иҟоуп.

Иазгәаҭатәуп азхаҵара аҳәынҭқарра аԥҵара шалымшо. Аԥсны аназхарҵа аамҭазы ҳаамҭазтәи аҳәынҭқарра иамоу аҟазшьа хадақәа зегьы аманы иҟан. Европа аума егьыс адунеи зегь аҟноума – ажәларқәеи амилаҭқәеи рхала хатәҳәаақәҵара апроцесс амҩаԥысра иаҿуп. Ари ҳаамҭазтәи адунеитә ҿиара атенденциа хадақәа ируакны иҟоуп.

–Иҟалап, хәҭакахьала иазхаҵо аҳәынҭқаррақәа Ҟрым амҩала ареферендум ҟаҵаны Урыстәыла иадлар еиҳа ирзеиӷьзар?

–Асеиԥш иҟоу азҵаарақәа рҟны иарбанызаалак аидкыларақәа залшом. Ҟрым – Урыстәыла иузаҟәымыҭхо хәҭаны иҟоуп. Иара ажәлар ракәзар, ахалаҽҳәаақәҵара азин рхы иархәаны, аамҭак азы ирцәыӡны иҟаз рыԥсадгьыл рҽадырҵеит. Аԥсны иамоу аҭоурыхтәи, асоциокультуратәи аполитикатәи ҷыдарақәа зынӡа иҽакӡоуп. Хықәкыс иамоугьы – ихьыԥшым, адунеижәларбжьаратә зхаҵара змоу ҳәынҭқарраны аҟалароуп.

–Украина иҟоу аҭагылазаашьа инадҳәаланы, иалшозма аимак аҽацәыхьчара?

–Украинатәи акризис зыхҟьаз, иара атәылауаа еиуеиԥшым аетникатәи арегионалтәи гәыԥқәа рԥеиԥш еиԥшымкәа иахьырбо ауп. Адәныҟатәи афакторқәа ракәзар, акризис иацхрааит ауп. Атәыла, зыҟны аграждантә милаҭра еиҿкааны иахьыҟам, иахьышьақәгылам ҭышәынтәалара аиуам. Аетникатә национализм ашәарҭара аҵоуп иарбанызаалак аҳәынҭқарразы. Иаҳҳәап – Қырҭтәыла. «Қырҭтәыла ақырҭцәа рзы» ҳәа алозунгқәа ирыҵагыланы атәыла хдырбгалеит. Машәырны иҟамлаӡеит иахьатәи Украина аԥыза-министр Арсении Иацениук Аԥсны аганахьала иқәгыларақәа аҿагылара ӷәӷәа зазнауыз Аԥсны Аҳәынҭқарра Адәныҟатәи аусқәа рминистрра. Украинатәи акризис аҭыԥ иқәҵахар алшоит афедералтә еиҿкааразы иаку акомплекстә уснагӡатәқәа рыдкыланы, ауааԥсыра рзинқәа рыхьчара алдыршар.

–Мраҭашәаратәи атәылақәа Ҟрыми Урыстәылеи реидылара иакны ирыдрымкылеит

–Ҟрым азҵаара ӡбоуп, украинатәи амшхәаԥштә иалгоуп. Иубартә иҟоуп уи ас шакәу аилкаара аиуа ишалагаз. Женеватәи ԥшь-ганктәи аиԥылара ахыркәшаратә документ аҟны апрель 17 рзы Ҟрым аӡбахә џьаргьы иҳәаӡам. Америкеи Евросоиузи Ҟрыми Урыстәылеи реидылара имҩаԥысыз хҭыск еиԥш иахәаԥшуеит ҳәа агәаанагара уоуеит.

–Рыҿиара шԥаҟоу урыстәыла-аԥснытәи аизыҟазаашьақәа?

–Ҳара ҳаизыҟазаашьақәа аиҩызаратә шьаҭа рымоуп. Аԥсни Урыстәылеи реидгыла аҭоурыхтәи адоуҳатәи ҵаҵӷәы амоуп. Урыстәылатәи Афедерациа Аԥсны Аҳәынҭқарра азханаҵеижьҭеи 80 инареиҳаны еиқәшаҳаҭра ҳнапы рыҵааҩхьеит. 2014 шықәсазы урыстәылатәи афинанстә цхыраарала Аԥсны еиҭашьақәыргылан ахархәарахь ирыҭахоит 50 инареиҳаны социалтә обиект – ахәышәтәырҭақәа, ашколқәа, аспортшколқәа, ахәыҷбаҳчақәа у.у.е.

–Изеиԥшроузеи иахьатәи аамҭазы Аԥсни Евросоиузи реизыҟазаашьақәа. Акьыԥхь аҟны иҳәан Евросоиуз шазыхио Аԥсны инарҭбааны ахәаахәҭратә усқәа рымҩаԥгара. Усоума ишыҟоу?

–Иналкааны, Евросоиуз Аԥсны инарҭбааны ахәаахәҭратә усқәа рымҩаԥгара иазыхины иҟаӡам. Урҭ Аԥсны Қырҭтәыла иахәҭакны ауп ишахәаԥшуа. Евросоиуз Аԥсны ахьыԥшымра макьанагьы изаднакыло иҟам. Европатәи ҳколлегацәа Аԥсны иацхраарц рҭахны иҟазар, аԥсуа уаажәларратә еилазаара ҳаҭыр ақәҵан ирызнеиуазароуп, урҭ Қырҭтәыла иахәҭакны ирмыхәаԥшлароуп. Аԥсны иаҭахны иҟоуп асоциал-економикатә инфраструктура аиҭашьақәыргылара. Дҵала агеополитикатә лхра лҵшәа аманы иҟам.

–Апрель 24 рзы иалагоит адипломат ҿарацәа рфорум. Арахь иаараны иҟоуп Урыстәылеи, Аԥсни Аахыҵ Уаԥстәылеи рдипломатиатә усҳәарҭақәа рхаҭарнакцәа. иарбоу атәылақәа рзы ҵакыс иамоузеи афорум ахалархәра?

–Сгәы иаанагоит аусеицура амеханизм ҿыцқәа аус рыдырулап ҳәа, аҟазшьа ҷыдақәа зманы иҟоу азҵаарақәа еицрылацәажәап ҳәа, аинтеграциеи, аекономикатә усеицуреи, аҭышәынтәалареи ашәарҭадареи распектқәеи, аимакқәа аҭыԥ рықәҵареи аинформациатә политика азҵаарақәеи рзы аилацәажәарақәа мҩаԥыргап ҳәа.


Возврат к списку



Аԥсны иазкны

Аминистрра

Адәныҟатәи аполитика

Аконсултә дырраҭара

Аналитика

Разработка сайта: ait
АԥСНЫ АҲӘЫНҬҚАРРА АДӘНЫҞАТӘИ АУСКӘА РМИНИСТРРА E-mail: info@mfaapsny.org; Tel: +7 (840) 226-70-69; Adress:. Lakoba, 21