aps | rus | eng | tur | de | it | ar | esp | fr


Аԥсны Аҳәынҭқарра
Адәныҟатәи аусқәа рминистрра

Аимадаратә информациа:
Аҭыӡҭыԥ: 384900 Лакоба имҩа 21, ақ. Аҟәа
+7 940 996 39 48 (амоб.)
+7 840 226 39 48 (аус.)
E-mail: visa@mfaapsny.org


Гал ақалақь аҟны имҩаԥысит изаамҭанытәиу, 47-тәи аинцидентқәа раԥырҟәҟәаарази хырыҩ рыҭарази Амеханизм алахәылацәа реиԥылара
Приднестровтәи Молдавтәи Ареспублика адәныҟатәи аусқәа Рминистрра аҿы Даур Ақаҩбеи Витали Игнатиеви реиҧылара мҩаҧысит

05.07.2012

Аҧсны Адәныҟатәи аусқәа рминистрра иҟанаҵаз аҳәамҭа

Аҧсны Адәныҟатәи аусқәа рминистрра агәалсра ду аанарҧшуеит Еиду Атәылақәа Реилазаара Ассамблеиа Хада ҧхынгәымза 3 2012 шықәсазы иаднакылаз ақәҵаразы «Қырҭтәыла иаҵанакуа Аҧсныи, Аахыҵ Уаҧстәыла, Цхинвалтәи арегиони рҟнытә ахҵәацәеи, зынхарҭа ҭыҧ еиҭазкыз атәылауааи рҭагылазаашьа» захьӡу.

Агәра ганы ҳаҟоуп, иарбанзаалак жәларбжьаратәи аполитикатә документ адкылара – зинла хымҧадатәи аҟазшьа амамзаргьы – шьаҭас иамазар шакәу афактқәа зегьы разгәаҭареи, аинтерес змоу аганқәа зегьы ргәаанагарақәа рызхьаҧшреи.

Убри аҟнытә ҳара иаҳзеилкаауам, Аҧснынтәи ахаҭарнакцәа ари ақәҵара апроект алацәажәаразы Еиду Атәылақәа Реилазаарахь ааҧхьара зрырымҭаз. Ари афакт ирыдыркылаз адокумент аобиективра ацәнарӡуеит, избанзар уи шьаҭас иамоу аконфликт иалахәу ганк аҟнытә аинформациа мацароуп. Аҧсуа ган даара агәра узыргаша аргументациа рымоуп ақәҵараҿы изызхьҧшуа апроблема ала. Убри аинформациа хымҧада иазгәаҭатәын Ассамблеиа Хада аҟны ақәҵаразы абжьыҭираан.

Инаҵшьны иҳәатәуп, ақәҵара зеиҧшла Еиду Атәылақәа Реилазаара Амаӡаныҟәгаҩ Хада ари апроблемазы мшаҧымза 22 2012 шықәсазы икьыҧхьыз иажәахә аҟны иарбоу аҧҟарақәа ишрықәымшәо. Фактлатәи аматериалқәа рхархәарала иеиҿкааз ари ажәахә аҟны иарбоу ихадоу апозициақәа ақәҵараҿы зынӡа ианымҧшӡеит.

Ҳәара аҭахума, еилкаауп ақәҵара авторцәа агуманитартә хықәкқәа мацара шракәӡамыз рҿаҧхьа иқәгылаз. Абас еиҧш иобиективтәым, ганкахьалатәи адокумент – уи ахьӡалагьы иааҧшуеит – адкылара иаҳәо акоуп: Қырҭтәыла аполитика-пропагандатә усура аелементқәа ишыруаку. Ҳалахь еиқәнаҵеит, ақәҵра иадгылаз атәылақәа рхыҧхьаӡараҿы машәырла иахьыҟалаз ицқьам аполитикатә хәмарра ишалахәу ззеилымкааз атәылақәагьы.

Ҷыдала иазгәаҭатәуп даҽа факткгьы: адунеи атәылақәа рыбжеиҳарак ари ақәҵара иадымгылаӡеит, ус анакәха адокумент аҵакы, аполитикатә зинмчра акырӡа илаҟәуеит, арахь иара абжьгаратә ҟазшьоуп иамоу.

Аҧсны Адәныҟатәи аусқәа рминистрра аҳәамҭа ҟанаҵоит, Еиду Атәылақәа Реилазаара Ассамблеиа Хада аҟны иобиективтәым абри ақәҵара адкылара Аахыҵ Кавказ аҭагылазаашьазы Женеватәи аиҿцәажәарақәа рымҩаҧгара акыр иаҧырхагахар шалшо. Аҧснытәи аган агәаанагара азгәаҭамкәа «ахҵәацәа рыпроблемагьы» узыӡбом, ҳтәыла иадҳәалоу иарбанзаалак даҽа зҵааракгьы узыӡбом. Убри аҟнытә Аҧсны Аҳәынҭқарра аламырхәӡакәа ирыдыркылаз ақәҵара акрызҵазкуа политкатә документк аҳасабала ахәаҧшра залшом.


Возврат к списку



Аԥсны иазкны

Аминистрра

Адәныҟатәи аполитика

Аконсултә дырраҭара

Аналитика

Разработка сайта: ait
АԥСНЫ АҲӘЫНҬҚАРРА АДӘНЫҞАТӘИ АУСКӘА РМИНИСТРРА E-mail: info@mfaapsny.org; Tel: +7 (840) 226-70-69; Adress:. Lakoba, 21