aps | rus | eng | tur | de | it | ar | esp | fr


Аԥсны Аҳәынҭқарра
Адәныҟатәи аусқәа рминистрра

Аимадаратә информациа:
Аҭыӡҭыԥ: 384900 Лакоба имҩа 21, ақ. Аҟәа
+7 940 996 39 48 (амоб.)
+7 840 226 39 48 (аус.)
E-mail: visa@mfaapsny.org


Гал ақалақь аҟны имҩаԥысит изаамҭанытәиу, 47-тәи аинцидентқәа раԥырҟәҟәаарази хырыҩ рыҭарази Амеханизм алахәылацәа реиԥылара
Приднестровтәи Молдавтәи Ареспублика адәныҟатәи аусқәа Рминистрра аҿы Даур Ақаҩбеи Витали Игнатиеви реиҧылара мҩаҧысит

Аԥсны Аҳәынҭқарра Адәныҟатәи аусқәа рминистрра ЕАР (США) Аҳәынҭқарратә департамент ауаҩы изинқәа ирызкны Ажәахә ахь еиқәнаршәаз ахҳәаа  10.06.2016

Аԥсны Аҳәынҭқарра Адәныҟатәи аусқәа рминистрра ЕАР (США) Аҳәынҭқарратә департамент ауаҩы изинқәа ирызкны Ажәахә ахь еиқәнаршәаз ахҳәаа

ЕАР (США) Аҳәынҭқарратә департамент адунеи аҿы 2015 шықәса аамҭа иалагӡаны, ауаҩы изинқәа рныҟәгара зызку есышықәсатәи ажәахә иакьыԥхьит. Аԥсны Аҳәынҭқарреи Алада Уаԥстәыла Ареспубликеи иаарԥшуп Қырҭтәыла «хазы зҽалызкаарц зҭаху» арегионқәа раҳасабала. Ажәахә абызшәа Аԥсны рацәак ианымаалаша «амацәаз иҭаку аҵакырадгьыл», «административтә еиҟәыҭхагатә цәаҳәа» раҳасабала еиқәыршәоуп, уи ЕАР (США) адәныҟаполитикатә усбарала Аԥсны аполитикатә ҵабырг агәхьаа амкра аанагоит. Зегь раԥхьаӡа иргыланы, Аҳәынҭқарратә департамент иагәалашәазарц ахәҭоуп Аԥсны Аҳәынҭқарра иара иатәу адгьылҵакыраҿ амчра нагӡа змоу, иазхаҵоу, ихьыԥшым ҳәынҭқарраны ишыҟоу. Аԥсны иахьаҵанакуа аурыс арратә базақәа рыҟазаара «амацәаз аҭакра» иадыргаӡам, избанзар уи Аҟәеи Москвеи ирыбжьарҵаз аҳәынҭқаррабжьаратә еиқәышаҭра шьаҭас иазышьҭоуп.

Иазгәаҭамзарц залшом, Аҳәынҭқарратә департамент ажәахә иагәылаз Аԥсны Аҳәынҭқарраҟны ауаҩытәыҩса изинқәа ирыҵаркуа адырра ӷәӷәала иҟоу аҵабырг иақәымшәо ишыҟаҵоу.

Убас, ажәахә иатәу амилаҭтә еиҵатәрақәа зызкыз пунктқәак рҟны иаҳәон Аԥсны Гал араион ауааԥсыра рзинқәа реилагара аҭыԥ амазшәа. Қарҭ иҟоу «иахҳәоу Аԥсны аиҳабыра» ҳәа зхы иашьҭоу аполитикатә гәыԥ иаднагало, ззымхарагьы убарц зылшо адырра маҷ иазхьаԥшуа, Аҳәынҭқарратә департамент иаанацҳауеит Гал араион аҟны аҵаҩцәа қырҭ бызшәала аҵара рҵартә аҭагылазаашьа рымам ҳәа. Иҟаҵәҟьоу афакт Аԥсны Гал араион иахьаҵанакуа ашколқәа рҿы урыс бызшәалеи, аԥсышәалеи, қырҭ бызшәалеи имҩаԥысуа аҵара арҭ реиԥш иҟоу иҵабыргым ахараҵара шиашам унарбоит. Апрактика излаҳнарбо ала, Гал араион ауааԥсыра аурыс бызшәа бзианы издыруа, Аԥсны иҟоу иреиҳау аҵараиурҭақәа ирҭалартә алшара рнаҭоит. Аԥсны Аҳәынҭқарра аиҳабыра Гал араион ауааԥсыра иаԥсыуоу уаажәларраны реидкыларазы, насгьы иреиӷьу рнырхаратә ҭагылазашьақәа рзаԥҵаразы ирылшо ҟарҵоит. Даҽазныкгьы иазгәаҭатәуп, адунеи аҿы иҟалап Аԥсны еиԥш даҽа тәылак ыҟамзаргьы, аибашьра нахыс 50 000 ахҵәацәа рынхарҭатә ҭыԥқәа рахь ихынҳәыртә алшара рызҭаз.

Ажәахә аҿы иазгәаҭан даҽа ииашамыз дыррак Гал араион ауааԥсыра Қырҭтәыла иахьаҵанакуа аҳәынҭқарратә ҳәаа ахыҵразы азин рырҭом ҳәа. Убас, 2015 шықәсазы Аԥсни Қырҭтәылеи рҳәаа иахыҵит хыԥхьаӡара рацәала ауааԥсыра. Аҳәынҭқарратә департамент иаанацҳауеит Аԥсны Аҳәынҭқарра иахьаҵанакуа жәларбжьаратәи агуманитартә усбарақәа рымҩаԥгара аҭыԥантәи аиҳабыра мап ацәнакуазшәа. Ари ажәахә автор иҟынӡа инагазар ахәҭоуп Аԥсны акырӡа ишыҵуа жәларбжьаратәи ООН еиԥш иҟоу агуманитартә еиҿкаарақәеи агентрақәеи, иаҳҳәозар ПРООН, UNICEF, УВКБ аус шыруа. Абарҭ иааидкыланы Аԥсны арегионқәа зегьы рҿы еиҟәыҭхарада амадара рыбжьоуп, аҭыԥантәи аиҳабыреи дареи ԥымкрада аус еицыруеит. Ажәахә аҿы иазгәаҭаз аинформациа аиура иаԥырхагоу аинтернет ахархәараҿы ахақәиҭтәра аҟамзаара иазку агәаанагара аҿагыларазы хымԥада иҳәатәуп Аԥсны иарбанзаалак аинтернет-ресурсқәа рышҟа иргәылоу аконтент аганахьала ԥкра шыҟам. Егьырҭ атәылақәа рҿеиԥш, Аԥсынгьы аинтернет атәылауааԥсыра реимадаразы, насгьы ахатә гәаанагарақәеи аинформациа адкыларази активлаҵәҟьа рхы ишадырхәо. ЕАР (США) Аҳәынҭқарратә департамент ажәахә Аԥсны иконкреттәу алшарақәа зынӡагьы иаанарԥшӡом, иаҳҳәозар, атәыла анапхгара абахҭа иҭаку ауаа рхара ахгара ацклаԥшра, ауаҩы изинқәа рыла Ауаажәларратә дкыларҭа аиҿкаара, иара убас ауаҩы изинқәа рыла Амчра нагӡа змоу аофис аартра.

Иааидкыланы иаҳҳәозар, иазгәаҭазарц ахәҭоуп, 2015 шықәсазтәи ЕАР (США) Аҳәынҭқарратә департамент еиқәнаршәаз ажәахә адунеи аҿы ауаатәыҩса рзинқәа ирызкны, ҷыдала Аԥсынгьы иадҳәалоу, Аԥсны Аҳәынҭқарраҿы ауаҩы изинқәа ирызку, аԥхьаҩ инаҭоит акырӡа ииашам, иобиективтәым, аиаша иаҿагыло адырра.


Возврат к списку



Аԥсны иазкны

Аминистрра

Адәныҟатәи аполитика

Аконсултә дырраҭара

Аналитика

Разработка сайта: ait
АԥСНЫ АҲӘЫНҬҚАРРА АДӘНЫҞАТӘИ АУСКӘА РМИНИСТРРА E-mail: info@mfaapsny.org; Tel: +7 (840) 226-70-69; Adress:. Lakoba, 21