Аԥсны Адәныҟатәи аусқәа рминистрра аҳәамҭа

Аԥсны Адәныҟатәи аусқәа рминистр ихаҭыԥуаҩ Олег Аршба цәыббра 1 азы Приднестровие ашьаҭаркра 26-шықәса ахыҵра иазкыз аныҳәатә уснагӡатәқәа иҽрылархәразы данцоз аамҭаз Кишенев ақалақь аҳаирбаӷәазаҟны даанкылан, нас адепортациа изун.

Аныҳәа аламҭалазы, Приднестровие акәша-мыкәша иҟоу аҭагылазаашьа уадаҩи иара убасгьы аныҳәа иалахәхараны иҟоу аделегациақәа рганахьала провокациақәак рымҩаԥысра ҟалар шалшои азыԥхьагәаҭо Приднестровие Адәныҟатәи аусқәа рминистрра алацәажәахьан Молдова аҵакырадгьыл аҟны атәымҳәынҭқарратә делегациақәа ԥырхага шырмоуа азы азҵаара. Молдоватәи аган ари иақәшаҳаҭын. Аха, Молдоватәи аган Аԥсны ахаҭарнак иганахьала аҩызаратә ҟазшьа змамыз ахымҩаԥгашьа аанарԥшит. Убас, 2015 шықәса цәыббрамзазы Аԥсны Ахада ихаҭыԥуаҩ Витали Габниа хадас дызмаз Аԥсны аделигациеи Кишиниов аҳаиртә баӷәазаҟны иааныркылахьан.

Асеиԥш иҟоу ахымҩаԥгашьала молдавиатәи аган Аԥсны Аҳәынҭқарреи Приднестровиатәи Молдавиатәи ареспубликеи рыбжьара ишьақәгылоу аизыҟазаашьақәа рзыҵшәаауам. Иҟалаз ахҭыс иунарбоит молдавиатәи анапхгара иргәамԥхо аҳәынҭқаррақәа ртәылауаа жәларбжьаратәи реинырра ақәыӷәӷәаратә политика рыҽшадыршәало.

Хыхь иарбоу азыԥхьагәаҭо Аԥсны Адәныҟатәи аусқәа рминистрра молдоватәи аган иаҿагылоит, имҩаԥнагаз аус дискриминациатә усуп ҳәа азыԥхьаӡаны. Ауаажәларратә еилазаарахьгьы ааԥхьара ҟанаҵоит асеиԥ иҟоу ахымҩаԥгашьа ԥхьаҟагьы иаԥдырҟәҟәаарц азы.