Адәныҟатәи аусқәа рминистрраҟны аиԥылара

Жьҭаара 7 рзы Аԥсны Адәныҟатәи аусқәа рминистрраҟны имҩаԥысит аминистр Даур Ақаҩбеи “OFS-9” аверсиала Аԥсны имҩаԥысуаз атурнир иалахәыз Ареспублика Афганисҭан аделегациеи реиԥылара. Краснодартәи атәылаҿацәтә уаажәларратә еиҿкаара «Афганская Община» апрезидент Рашиди Фарид Маджид-иԥа Аԥсны Ахада Рауль Ҳаџьымба ҭабуп ҳәа иеиҳәеит апроект иаиҭаз адгыларазы.

Даур Ақаҩба асасцәа ҭабуп ҳәа реиҳәеит атурнир рхы ахьаладырхәыз азы, Афганисҭантәи ММА Афедерациа аиааиразы уи апрезидент База Мухаммад Мубариза идиныҳәалеит атурнир аҟны риааира. Аиԥылара мҩаԥысит аиҩызаратә ҭагылазаашьа ԥхарра аманы.