Даур Ақаҩба Луис Альберто Молина Куадра адныҳәаларатә шәҟәы изишьҭит

Аԥсны Адәныҟатәи аусқәа рминистр Даур Ақаҩба Никарагуа Ареспублика Адәныҟатәи аусқәа рминистр ихаҭыԥуаҩ Луис Альберто Молина Куадра имшира инадҳәаланы адныҳәаларатә нота изишьҭит.

Адныҳәалараҟны иаҳәоит:

«Шәара шәаҳаракыра!

Аԥсны Аҳәынҭқарраҟны ҳаҭыр ду шәықәырҵоит аԥсуа-никарагуантәи аизыҟазаашьақәа рыҿиара активла шәхы ахьалашәырхәуазы. Шәара шәҟазара адунеижәларбжьаратә еизыҟазаашьақәа рырӷәӷәара иацхраауеит. Ҳара аԥхарра ду аҵаны иаҳгәалаҳаршәоит 2013 шықәса рзы Аԥсны шәыҟазаареи аԥснытәи аделегациа Никарагуа Апрезидент Хосе Даниэля Ортеги Сааведра иинаугурациа ралахәраан ҷыдала иҳақәышәҵаз аҳаҭыр дуи. Ишәзеиӷьасшьоит ақәҿиара дуқәа, агәабзиара».