aps | rus | eng | tur | de | it | ar | esp | fr


Аԥсны Аҳәынҭқарра
Адәныҟатәи аусқәа рминистрра

Аимадаратә информациа:
Аҭыӡҭыԥ: 384900 Лакоба имҩа 21, ақ. Аҟәа
+7 940 996 39 48 (амоб.)
+7 840 226 39 48 (аус.)
E-mail: visa@mfaapsny.org


Гал ақалақь аҟны имҩаԥысит изаамҭанытәиу, 47-тәи аинцидентқәа раԥырҟәҟәаарази хырыҩ рыҭарази Амеханизм алахәылацәа реиԥылара
Приднестровтәи Молдавтәи Ареспублика адәныҟатәи аусқәа Рминистрра аҿы Даур Ақаҩбеи Витали Игнатиеви реиҧылара мҩаҧысит

Аԥсны Адәныҟатәи аусқәа рминистр Иракли Хынҭәба дырԥылеит 5-тәи жәларбжьаратәи астудентцәа рконгресс «Интердиалог: АԤСНЫ. SU» алахәхаразы Ҭырқәтәылантәи иааз аԥсуа ҿарацәа гәыԥҩык 16.10.2012

Аԥсны Адәныҟатәи аусқәа рминистр Иракли Хынҭәба дырԥылеит 5-тәи жәларбжьаратәи астудентцәа рконгресс «Интердиалог: АԤСНЫ. SU» алахәхаразы Ҭырқәтәылантәи иааз аԥсуа ҿарацәа гәыԥҩык

«Аԥсуа-аурыс ҿар рконгресс Ҭырқәтәла иҟоу аԥсуа ҿар алахәхоит ҳәа иҳаҳаз ажәабжь даара ҳгәы иахәеит, – ҳәа азгәеиҭеит асасцәа аԥсшәа раҳәауа Иракли Хынҭәба. – Бзиала шәаабеит ҳәа шәаҳҳәоит Аԥсны! Жәаҳәарада, ас еиԥш иҟоу, аҳәаанырцәтәи ҳтәылауааи ҳареи, Урыстәылантәи ҳҩызцәеи ҳаимадара иазеиӷьу аусмҩаԥгатәқәа лассы-лассы еиҿаҳкаалароуп. Ҳаиҿцаара иаԥырхагоу амзызқәа ыҟоуп, аха агәра ҳгоит иахьатәи аҿарацәа шәеиҳабацәа ихацдыркыз аиҩызара атрадициақәа ишрыцышәҵо, еиҳагьы ишшәырӷәӷәало.

Иахьа Аԥсны иҳалшо зегьы ҟҳҵоит Сириа иҟоу ҳаицтәылауаа рҭоурыхтә ԥсадгьыл ахь рырхынҳәра алыршаразы. Ҭырқәтәылантәи ҳтәылауаагьы ахынҳәра иаҿуп. Егьа иуадаҩу асоциал-економикатә проблемақәа рԥыларгьы, аԥсадгьыл ахь абзиабараҵәҟьа змоу, зыжәлар ирыхәҭакхарц зҭаху ауаа хынҳәуеит ҳәа сақәгәыӷуеит. Иахьа абра шәыҟаны шәашьцәеи шәареи шәахьеибабо гәырӷьара дууп. Урыстәылатәи Афедерациа арегионқәа рҟынтәи аҿарацәеи шәареи шәеибадырыртә, шәеиҩызцәахартә еиԥш аҭагылазаашьа ахьыҟоугьы даара ибзиоуп».

Аделегациа иалахәын асоциологиа, атуризм, аекономика, афинансқәа уҳәа еиуеиԥшым азаанаҭқәа рыла Ҭырқәтәылатәи иреиҳау аҵараиурҭақәа роушьҭымҭацәеи астудентцәеи. Урҭ рҟынтә аӡәырҩы Аԥсны аусура иаарц азы агәаҳәара аадырԥшит.

Аделегациа алахәылаҩцәа иазгәарҭеит, аҿар рфорум аҽалархәразы урҭ арахь рааԥхьара иабзоураны урҭ Аԥсны аҿар ирыхәҭакны рхы рбо иҟалеит ҳәа. Астудентцәа ауниверситетқәа рыбжьара аимадарақәа рышьақәыргылара шырҭаху азгәарҭеит. Аминистр ихаҭыԥуҩ иреиҳәеит ари азҵаара аҵыхәала аусура шцо.

Қырҭтәыла ишьақәгылаз аполитикатә ҭагылазаашьа ҿыц иазкны астудентцәа руаӡәы изҵаара аҭак ҟаҵо Иракли Хынҭәба иазгәеиҭеит: «Қырҭтәыла имҩаԥысуа аиҭакрақәа ҳрыцклаԥшуеит, аиаша ҳҳәозар, алхрақәа раан Саакашвили ирежим ахьаҵахаз иагьџьаҳамшьеит. Иахьа Аԥсны аганахьала «аидеиа ҿыцқәак» рыӡбахә ҳаҳауеит. Аха ҳара иахәҭоу аинформациа ҳамоуп аиашеи амци ахьыҟоу аилыргаразы. Ишакәхалакгьы Аԥсны Қырҭтәыла иалаларц хықәкыс ирыманы иаадырԥшуа аинициативақәа аӡәгьы рыгәра игаӡом. Қырҭтәылеи ҳареи зҵаара заҵәык алацәажәара ҳазыхиоуп – абџьар ахамырхәаразы аиқәшаҳаҭра анапаҵаҩра. Ҳхьыԥшымра ашәарҭара ишҭагылам агәра ҳгаҵәҟьаны ҳҟалаанӡа иарбанзаалак агуманитартә мамзаргьы аекономикатә проектқәа рылацәажәара ҳгәы иҭаӡам. Ахьыԥшымроуп Аԥсны Аҳәынҭқарра аҟазаара форма заҵәыс иалнахуа. Иванишвили еиҿикааз аиҳабыра рганахьала иаҳдырша ҳдыруеит. Урҭ рполитика аиашареи аҟәышреи шьаҭас ишамоу ашьақәырӷәӷәаразы иҟарҵарц ирылшо акызаҵәык Аԥсны ахьыԥшымра азхаҵароуп. Егьыс даҽак аԥшьаргарц ргәы иҭазар, зегьы башахоит. Аԥсны уаҳа ахаангьы Қырҭтәыла иалалом».

Аԥсныи Урыстәылеи реизыҟазаашьақәа ахҳәаа рызуа, Хынҭәба иазгәеиҭеит: «Урыстәылеи ҳареи ҳаизыҟазаашьақәа ирласны иҿиоит. Қырҭтәылеи уи иадгыло атәылақәеи ус еиԥш агәаанагара адунеи иахдырҵәар рҭахуп Аԥсны аиҳабыра ахала акагь амыӡбошәа. Ари ҳхьыԥшымра иаҿагыло зегьы еиқәдырҽаҽо мцуп. Адунеи атәылақәа зегьы рҟынтә иахьа иҳацхраауа Урыстәыла мацароуп. Урыстәылатәи Афедерациеи ҳареи иҳабжьоу аҳәынҭқаррабжьаратә еизыҟазаашьақәа рыҩаӡара ҳаракы ҳақәшәозароуп.

Ҳаизыҟазаашьақәа рҳәаақәа ирҭагӡаны иӡбахо азҵаарақәа шаҟа профессионала, ҭакԥхықәрала ҳарзыҟало аҟара ҳастратегиатә усеицура ахаҭабзиарагьы иацлоит. Есышықәса еиӷьу алҵшәақәа ааҳарԥшуеит, есааирагьы жәларбжьаратәи аизыҟазаашьақәа рылахәхаразы иҟоу аҩаӡара ҳазааигәахоит.

Аминистр ихаҭыԥуаҩ аҿар дыдирдырит Адәныҟатәи аусқәа рминистрра Ҭырқәтәылеи Мрагылара Ааигәеи рыҟәша аиҳабы Инар Гыцба. «Гәык-ԥсыкала бзиала шәаабеит ҳәа шәасҳәоит Аԥсны! Шәҭоурыхтә ԥсадгьыли ара иҟоу шәашьцәеи шәаҳәшьцәеи еиҳа шәырзааигәхарц иҟашәҵо ари алагалазы иҭабуп ҳәа шәаҳәара иаԥсоуп. Аҭоурыхтә мзызқәа ирыхҟьаны ҳажәлар иахьа еиҟәшоуп. Аха сара агәра згоит ҳдиаспора, еиҳаракгьы аҿарацәа, иааныркыло апозициа иаша иабзоураны мышкызны жәларыкны ҳаилаҵәап ҳәа. Иахьа ҳаибабара иаԥырхагахаша акгьы ҟалар ауӡом. ҳара ҳганахьала иҳалшо зегь ҟаҳҵалоит арҭ аимадарақәа рырӷәӷәаразы, еиҳа еиӷьны ҳаилибакааларц азы. Аконгресс аҟны шәусура маншәалахааит, аҩызцәа бзиақәа шәырҳааит, аччареи агәырӷьареи шәыгымзааит!» – ҳәа азгәеиҭеит Инар Гыцба.

Аиԥылараҿы ирзааҭгылан Ҭырқәтәылеи ҳареи ҳаимадара иазку егьырҭ азҵаарақәагьы. Ҭырқәтәылантәи аԥсуа ҿар иҭабуп ҳәа рҳәеит аинтерес ду зҵаз аиԥыларазы, Аԥсны иҟоу аҿари дареи рыбжьара аимадара бзиа шышьақәгыло зы агәыӷрагьы аадырԥшит.


Возврат к списку



Аԥсны иазкны

Аминистрра

Адәныҟатәи аполитика

Аконсултә дырраҭара

Аналитика

Разработка сайта: ait
АԥСНЫ АҲӘЫНҬҚАРРА АДӘНЫҞАТӘИ АУСКӘА РМИНИСТРРА E-mail: info@mfaapsny.org; Tel: +7 (840) 226-70-69; Adress:. Lakoba, 21