aps | rus | eng | tur | de | it | ar | esp | fr


Аԥсны Аҳәынҭқарра
Адәныҟатәи аусқәа рминистрра

Аимадаратә информациа:
Аҭыӡҭыԥ: 384900 Лакоба имҩа 21, ақ. Аҟәа
+7 940 996 39 48 (амоб.)
+7 840 226 39 48 (аус.)
E-mail: visa@mfaapsny.org


Гал ақалақь аҟны имҩаԥысит изаамҭанытәиу, 47-тәи аинцидентқәа раԥырҟәҟәаарази хырыҩ рыҭарази Амеханизм алахәылацәа реиԥылара
Приднестровтәи Молдавтәи Ареспублика адәныҟатәи аусқәа Рминистрра аҿы Даур Ақаҩбеи Витали Игнатиеви реиҧылара мҩаҧысит

Аахыҵ Кавказ аҭынчреи атышәынтәалареи рзы Женеватәи аиҿцәажәарақәа 21-тәи араунд иазкны Аԥсны Адәныҟатәи аусқәа рминистр Виачеслав Чрыгба ипресс-конференциа 23.10.2012

Аахыҵ Кавказ аҭынчреи атышәынтәалареи рзы Женеватәи аиҿцәажәарақәа 21-тәи араунд иазкны Аԥсны Адәныҟатәи аусқәа рминистр Виачеслав Чрыгба ипресс-конференциа

Жьҭаарамза 23 рзы имҩаԥысит Аахыҵ Кавказ аҭынчреи атышәынтәалареи рзы Женеватәи аиҿцәажәарақәа 21-тәи араунд иазкыз Аԥсны Адәныҟатәи аусқәа рминистр Виачеслав Чрыгба ипресс-конференциа. Уи далахәын амнистр ицхырааҩ Инар Гыцбагьы.

Виачеслав Чрыгба иажәақәа рыла, ари араунд аинтерес аманы имҩаԥысит. Қырҭтәыла иҟалаз аҵыхәтәантәи аполитикатә хҭысқәа ирхырҟьаны анаҩстәи аиҿцәажәарақәа раан урҭ рделегациа аилазаашьа аҽаԥсахуеит. Уажәтәи аиԥылараҿы қырҭтәылатәи аделегациа иалахәын аиҳабыра ҿыц ахаҭарнакцәа ҩыџьа – Паата Закареишвили, Георги Вольски. «Қырҭтәыла аиҳабыра ҿыц аганахьала агәыӷра дуқәа ҳамам, избанзар урҭ уаанӡеиԥш гәҭакыс ирымоу Аԥсны Қырҭтәыла иалаларц ауп – уи ҳара иҳазҳадкылом, аха ус шакәугьы, зегь акоуп, ҳара ҳзы акраҵанакуан иааиуа аиҿцәажәарақәа раан урҭ ажәалагалақәас иҟарҵарц ргәы иҭоу», – иҳәеит В. Чрыгба.

Женева аусура цон, традициала ишаԥу еиԥш, ашәарҭадареи агуманитартә зҵаарақәеи рылацәажәара ирызку ҩ-гәыԥк рҟны. Раԥхьатәи амш азы аинформациатә сессиа мҩаԥысит, иформалтәым аиԥыларақәа рзгьы аамҭа ыҟан. Аҩбатәи амш зегьы аиҿцәажәарақәа ирызкын.

Аҩбатәи амш азы иззааҭгылаз азҵаарақәа ируакын Гал араион аҟны Аидысларақәа раԥырҟәҟәаареи анырра рыҭареи рзы амеханизм аусура аиҭарҿыцра. «Амеханизм аус ауӡом, ари аганқәа акыр ргәы иалоуп. Ишдыру еиԥш, Евроеидгыла ахаҭарнак Тышкевич имандат аҿҳәара шықәсык ацҵан. Евроеидгыла Ахылаԥшратә Миссиа ахада иганахьала иҳамоу апозициа ԥсахрада иаанхоит, ус анакәха Амеханизм аусура аиҭалагара азҵаара макьана алацәажәара иаԥсам», – ҳәа аҳәамҭа ҟаиҵеит В. Чрыгба.

Аԥсныи Аахыҵ Уаԥстәылеи Қырҭтәылеи рхадацәа абџьар мчы ахамырхәаразы уаанӡа ганкахьалатәи аҳәамҭақәа шыҟарҵахьазгьы, аԥсуа делегациа Женева рыҟазаара хықәкы хадас иамоуп Аԥсныи Қырҭтәылеи рыбжьара абџьар мчы ахамырхәаразы азинтә шьаҭа змоу аиқәшаҳаҭра анапҵаҩра. Аха рыцҳарас иҟалаз, Қырҭтәыла ари еиԥш аиқәшаҳаҭра адкылара мап ацәнакуеит, Аԥсныи Аахыҵ Уаԥстәылеи рхьыԥшымра азхаҵароуп уи иаанаго ҳәа иԥхьаӡаны. Аганқәа абас еиԥш аиҿагылара ахьроуз азоуп Женеватәи аиҿцәажәарақәа рҟны акризис зыҟалаз.

21-тәи араунд аҟны аԥсуа делегациа рықәгылара ихадароу ахәҭа азкын Женеватәи аиҿцәажәарақәа рформат аԥсахра: аекспертцәа рформат аҟнытә аделегациақәа рформат ахь аиасра. Уи адагьы ажәалагала ҟаҵан иҟоу ҩ-усуратә гәыԥк акны реидкыларазы. Аминистр иажәақәа рыла, ажәалагалақәа рыҩбагьы Евроеидгылеи Қырҭтәылеи иҽеимкәа ирыдыркылеит.

Женеватәи аиҿцәажәарақәа ԥхьаҟатәи рԥеиԥши рхықәки дазааҭгыло, аминистр иазгәеиҭеит Аԥсны ԥхьаҟагьы аиҿцәажәарақәа ишрылахәзаауа. «Жәларбжьаратәи ауаажәларратә еидгылақәа рымадаразы Женеватәи аиҿцәажәарақәа хархәага бзиас ишыҟац иаанхоит. Аԥсны ахьыԥшымра шазхаҵоугьы, егьырҭ атәылақәа рҿы аҵҳаражәҳәарҭақәеи ахаҭарнакрақәеи ахьҳамоу маҷуп. Убри аҟнытә Женеватәи аиҿцәажәарақәа алшара ҳарҭоит Евроеидгылеи, Еиду амилаҭқәа реилазаареи, Ашәарҭадареи аусеицуреи рзы Европатәи ахеилаки, Урыстәылеи, Еиду Америкатә штатқәеи ишиашоу ҳаҽрымаҳдарц. Аиҿцәажәарақәа рҳәаақәа ирҭагӡаны имҩаԥысуа аиԥыларақәа рҵакы рацәоуп ҳара ҳзы, ашәарҭадаразы ҳпозициа аҳәара алшара ахьҳарҭо иабзоураны. Ус анакәха, Женеватәи аиҿцәажәарақәа рыцәгьа аасҭа рыбзиа еиҳауп ҳәа ҳҳәар ауеит», – иҳәеит аминистр.


Возврат к списку



Аԥсны иазкны

Аминистрра

Адәныҟатәи аполитика

Аконсултә дырраҭара

Аналитика

Разработка сайта: ait
АԥСНЫ АҲӘЫНҬҚАРРА АДӘНЫҞАТӘИ АУСКӘА РМИНИСТРРА E-mail: info@mfaapsny.org; Tel: +7 (840) 226-70-69; Adress:. Lakoba, 21