aps | rus | eng | tur | de | it | ar | esp | fr


Аԥсны Аҳәынҭқарра
Адәныҟатәи аусқәа рминистрра

Аимадаратә информациа:
Аҭыӡҭыԥ: 384900 Лакоба имҩа 21, ақ. Аҟәа
+7 940 996 39 48 (амоб.)
+7 840 226 39 48 (аус.)
E-mail: visa@mfaapsny.org


Гал ақалақь аҟны имҩаԥысит изаамҭанытәиу, 47-тәи аинцидентқәа раԥырҟәҟәаарази хырыҩ рыҭарази Амеханизм алахәылацәа реиԥылара
Приднестровтәи Молдавтәи Ареспублика адәныҟатәи аусқәа Рминистрра аҿы Даур Ақаҩбеи Витали Игнатиеви реиҧылара мҩаҧысит

Абҵарамза 13 Аԥсны Адәныҟатәи аусқәа рминистр инапхгарала имҩаԥысит Аминистрра Аколлегиа аилатәара 13.11.2012

Абҵарамза 13 Аԥсны Адәныҟатәи аусқәа рминистр инапхгарала имҩаԥысит Аминистрра Аколлегиа аилатәара

Аилатәара рхы аладырхәит аминистрра анапхгара, аҟәшақәа реиҳабацәа, Урыстәылатәи Афедерациаҟны иҟоу Аҭакзыԥхықәу, Азинмчра наӡа змоу Аԥсны Аҳәынҭқарра Ацҳаражәҳәаҩ Игор Ахба, иара убасгьы Аԥсны Ахада иусбарҭа аиҳабы Беслан Кәыбраа. Аилатәара ааиртит Аԥсны Адәныҟатәи аусқәа рминистр Виачеслав Чрыгба, дагьалацәажәеит ааигәа имҩаԥысыз 21-тәи Женеватәи аиҿцәажәарақәа рцашьеи ԥхьаҟатәи рԥеиԥши. Аминистр еизаз ирылаиҳәеит аиҿцәажәарақәа рҟны аԥсуа делегациа иааннакылаз апозициа зеиԥшроу, аиҿцәажәарақәа рылахәцәа рформат шыԥсахтәу, аделегациақәа рыҩаӡара аҟынӡа ишышьҭыхтәу. «Аиҭакра дуқәа ҳшырзыԥшымгьы, ҳгәы иаанагоит аформат аԥсахра аиҿцәажәарақәа рылҵшәақәа акырӡа еиӷьыртәоит ҳәа», – азгәеиҭеит В. Чрыгба. Женеватәи аиҿцәажәарақәа рҟны Аԥсны алахәхара аганахьала ауаажәларраҿы аскептицизм шыҟоугьы, Виачеслав Чрыгба иазгәеиҭеит Аԥсны аӡбахә ахьырҳәо аҭыԥқәа рҿы хымԥада ҳтәыла ахаҭарнакҵәа ыҟазароуп ҳәа, мамзар адәахьтәи ҳсуверенитет акырӡа имаҷҳоит.

Анаҩс ажәа иман Аԥсны Адәныҟатәи аусқәа рминистр ихаҭыԥуаҩ Иракли Хынҭәба, уи дазааҭгылеит «Аԥсны Аҳәынҭқарра иаку адәныҟатәи аполитика амҩаԥгараҿы Адәныҟатәи аусқәа рминистрра иамоу аҳәаақәҵаратә роль» ҳәа хьӡыс измоу Аԥсны Ахада иқәҵара анагӡашьа шцо атәы. «Ари еиԥш ақәҵара ацәырҵра Ареспубликаҿы аусбарҭабжьаратәи аимадарақәа зырманшәало фактны иҟалеит. Иахьазы хәыҷы-хәыҷла Аԥсны Аҳәынҭқарра амчратә усбарҭақәа рыбжьара аусеицуразы иахәҭоу аҳәаақәҵаратә система ашьақәгылара иаҿуп ҳәа ҳҳәар ҳалшоит», – азгәеиҭеит И. Хынҭәба.

Урыстәылатәи Афедерациаҟны иҟоу Аԥсны Аҳәынҭқарра Аҭакзыԥхықәу, Азинмчра наӡа змоу Ацҳаражәҳәаҩ Адәныҟатәи аукәа рминистрра аиҳабыра ирыдиныҳәалеит акыршықәса раахыс раԥхьаӡа акәны имҩаԥгаз Аминистрра Аколлегиа аизара. Игор Ахба иажәақәа рыла, Аколлегиа аҿаԥхьа иқәнаргыло азҵаарақәа иара аминистрра ахаҭеи аҳәаанырцә иҟоу уи ахаҭарнакрақәеи русуразы акырӡа рыҵаркуеит. Ацҳаражәҳәаҩ дазааҭгылеит иара убас Ацҳаражәҳәарҭаҿы уажәазы имҩаԥысуа аусқәеи, Ацҳаражәҳәарҭеи Аминистрреи русуратә еимадара азҵаарақәеи.

Аԥсны Ахада иусбарҭа аиҳабы Беслан Кәыбраа излазгәеиҭаз ала, Аԥсны Адәныҟатәи аусқәа рминистрра иалнахыз астратегиатә мҩала ицалароуп, макьаназы инаӡоу азакәанԥҵаратә система шҳамамгьы. «Ахҭысқәа ирласны рҽырыԥсахуеит, убри аҟнытә Адәныҟатәи аусқәа рминистррагьы ианаамҭоу урҭ анырра рынаҭалароуп», – ҳәа азгәеиҭеит Б. Кәыбраа.

Аилатәара аҩбатәи азбжазы Аминистрра аҟәшақәа реиҳабацәа иеиҭарҳәеит Боливариантәи Ареспублика Венесуелеи, Урыстәылатәи Афедерациеи, Аахыҵ Уаԥстәылеи рҟны Аԥсны Аҳәынҭқарра Ацҳаражәҳәарҭақәеи Приднестровиа-Молдавиатәи Ареспубликеи, Ҭырқәтәылеи, Германиеи рҟны Аԥсны Аҳәынҭқарра Ахаҭарнакрақәеи русура шцо.

Аилатәараҿы изныкымкәа иазгәаҭан Адәныҟатәи аусқәа рминистрреи аҳәаанырцә иҟоу уи ахаҭарнакрақәеи рыбжьара аҳәаақәҵаратә еимадарақәа еиҳа иааигәаны ишыбжьаҵатәу.

Аизара ахыркәшамҭаз Адәныҟатәи аусқәа рминистр Виачеслав Чрыгба Аколлегиа аилатәара аконцептуалтә лҵшәақәа дырзааҭгылеит, Аколлегиа аусура аҵакы рацәа шамоу азгәеиҭеит.


Возврат к списку



Аԥсны иазкны

Аминистрра

Адәныҟатәи аполитика

Аконсултә дырраҭара

Аналитика

Разработка сайта: ait
АԥСНЫ АҲӘЫНҬҚАРРА АДӘНЫҞАТӘИ АУСКӘА РМИНИСТРРА E-mail: info@mfaapsny.org; Tel: +7 (840) 226-70-69; Adress:. Lakoba, 21