aps | rus | eng | tur | de | it | ar | esp | fr


Аԥсны Аҳәынҭқарра
Адәныҟатәи аусқәа рминистрра

Аимадаратә информациа:
Аҭыӡҭыԥ: 384900 Лакоба имҩа 21, ақ. Аҟәа
+7 940 996 39 48 (амоб.)
+7 840 226 39 48 (аус.)
E-mail: visa@mfaapsny.org


Гал ақалақь аҟны имҩаԥысит изаамҭанытәиу, 47-тәи аинцидентқәа раԥырҟәҟәаарази хырыҩ рыҭарази Амеханизм алахәылацәа реиԥылара
Приднестровтәи Молдавтәи Ареспублика адәныҟатәи аусқәа Рминистрра аҿы Даур Ақаҩбеи Витали Игнатиеви реиҧылара мҩаҧысит

Аԥсны Адәныҟатәи аусқәа рминистрра апресс-маҵзура иҟанаҵаз ахҳәаа 19.11.2012

Аԥсны Адәныҟатәи аусқәа рминистрра апресс-маҵзура иҟанаҵаз ахҳәаа

Аԥсны ауаажәларреи аиҳабыреи ҭынч ирыдыркылеит Қырҭтәыла аиҳабыра ҿыц анеиреи уи иадҳәаланы имҩаԥысыз аполитикатә ҽеиҭакрақәеи. Аԥсны Адәныҟатәи аусқәа рминистрра агәыларатә тәылаҟны имҩаԥысуа аполитикатә процессқәа ирхылаԥшуеит. Иазгәаҳҭоит, Аԥсныи Қырҭтәылеи ирыбжьоу аҳәынҭқарратә конфликт аӡбара аганахьала амчра ҿыц ргәаанагара рыԥсахит ҳәа Аԥсны аиҳабыра агәра шамго, ааигәа амаҵура иахагылаз аминистрцәа ицәырганы уи атәы аҳәара ишашьҭоугьы. «Аԥсны азхаҵарада зегьы ҳазыхиоуп» ҳәа аума, «ишиашоу аԥсуаа ҳаҽрымаҳдоит» мамзаргьы «аихамҩа ааҳартуеит» ҳәа аума, ирҳәалакгьы стратегиатә хықәкыс ирымоу акоуп – ишакәхалакгьы Аԥсны Қырҭтәыла алаҵара. Ҳара иҳамоу аинформациа азхоит шьоукы-шьоукы Аԥсны ақәша-мықәша идыргылар ирҭаху ацәҟьарақәа ҳрымкырц.

Уи аганахьала Аԥсны аиҳабыра ԥсахра зқәым апозициа рымоуп. Қырҭтәылеи ҳареи ҳабжьара абџьар ахамырхәаразы аиқәшаҳаҭра адкылара алацәажәара ҳазыхиоуп, аха уи аилацәажәара ишьҭнахуа аполитикатә формат ҳадаҳкылартә иҟазароуп.

Ҳара излаҳаԥхьаӡо ала, Женевтәи аиҿцәажәарақәа Аԥсны Аҳәынҭқарра иамоу апозициа жәларбжьаратәи аҩаӡараҟны аҳәаразы алшара ҳарҭоит. Убас, аҵыхәтәантәи Женеватәи аиҿцәажәарақәа раан Аԥснытәи аделегациа Урыстәылеи Аахыҵ Уаԥстәылеи рҟынтәи аколлегацәа рыцхыраарала иалшеит «аурыс мпыҵахалара» ҳәа Аԥсны акгьы шыҟам ашьақәырӷәӷәара. Уи анаҩс, жәларбжьаратәи апартниорцәа ирзеиҭаҳәан Гал араион аҟны аҵыхәтәантәи аамҭазы лассы-лассы Қырҭтәыла имҩаԥырго ишалагаз адиверсиа-террористтә цәгьоурақәа.

Иара уи аамҭазы Женеватәи аиҿцәажәарақәа рформат уаҳа иҳазҳадкылом. Аԥсны ишьақәгылаз уи аформат аԥсахра хымԥадатәиуп ҳәа иахәаԥшуеит, аделегациақәа рыҩаӡара аҟынӡа алахәхара шьҭыхны. Ҳара ҳпозиациа рылаҳҳәеит Женеватәи аиҿцәажәарақәа 21-тәи араунд аҟны, иааиуа араундқәа рҟынгьы аформат аԥсахра ҳашьҭазаауеит.

Иазгәаҭатәуп, адипломатиатә усура, Женеватәи аиҿцәажәарақәа рылахәхарагьы уахь иналаҵаны, еснагь иаарласны, иубаратәи алҵшәақәа шаанамышьҭуа. Ари даараӡа аџьабаа зцу, аиҭакра бзиақәа аазгаша аҭагылазаашьақәа аԥызҵо усуп. Убри аҟнытә Женеватәи аиҿцәажәарақәа ахәшьара рыҭараан аццакра иаԥсам.

Аԥсны адәныҟатәи аполитикаҿы хықәқы хадас иҟақәоу иреиуоуп ҳхьыԥшыира жәларбжьаратәи азхаҵара аиура. Убри аҟнытә Қырҭтәыла аганахьала азхаҵара аиура иаҵанакуа рацәоуп, уи ала Аԥсны иамоу аҳәынҭкарратә хьыԥшымра астатус жәларбжьаратәи азхаҵара аиура апроцесс алагоит. Қырҭтәыла Аԥсны ахьыԥшымра азханаҵар, арегион аҟны ашәарҭадаратә система акырӡа иӷәӷәахоит.

Убри аҟнытә Қырҭтәыла Аԥсны ахьыԥшымра азханаҵар шәарҭоуп, мап ацәаҳкроуп ҳәа атәылауаа шьоукы-шьоукы ирымоу агәаанагара зынӡаск иҵаҵӷәыдоуп. Аԥсны – зхы иақәиҭу, жәларбжьаратәи азхаҵара змоу ҳәынҭқаррак аҳасабала, агәыларатә тәылақәа аус рыцура ацашьеи аҟазшьеи ахала иҳәаақәнаҵар алшоит, амиграциатә политика хадара злоу ахырхарҭақәагьы уахь иналаҵаны. Даҽакала иаҳҳәозар, Қарҭ Аԥсны ахьыԥшымра аназханаҵа ашьҭахь, Қырҭтәыла аганахьала аекономикатә, адемографиатә, акультуратә ныррақәа зегь рыла ҳарзаатуеит ҳәа агәаанагара баша хыҭхәыцаауп.

Абџьармчы ахамырхәаразы аиқәшаҳаҭра анапаҵаҩра ишазхиоу Қырҭтәыла ишаанамырԥшыцгьы, Аԥсны аиҳабыра иахәҭаз зегь ҟарҵеит Егры аӡиас ала аҳәынҭқарратә ҳәаа аусура аҭышәынтәаларазы. Аԥсны Аҳәынҭқарра – ихьыԥшым ҳәынҭқарроуп, ус анакәха агәыларатә тәылақәеи иареи рыбжьара ишахәҭоу еиԥш ихьчоу, еиқәыршәоу аҳәаақәа амазароуп. Аҳәаахьчаратәи, аҳазалхратәи инфраструктурақәа еиқәшәаны русура иабзоураны изакәантәым аԥсуа-ақырҭуа ҳәаа ахысрақәеи аконтрабандеи акырӡа рхыԥхьаӡара иагхеит. Аофициалтә аушьҭратә пунктқәа русура алагареи аҳәаахысратә процесс ахылаԥшра аиӷьтәреи Аԥсны аҵакырадгьыли атәылауааи ршәарҭадара арӷәӷәоит.

Иазгәаҳҭоит даҽакгьы, Урыстәылатәи Афедерациеи Қырҭтәылеи рҳәынҭқаррабжьаратә еизыҟазаашьақәа егьа рҽеиҭаркыргьы, Урыстәылеи ҳареи ҳастратегиатә усеицура акгьы аԥырхагахом. Урыстәылатәи апартниорцәа Аԥсны Аҳәынҭқарреи Урыстәылатәи Афедерациеи ирыбжьарҵаз Аахыҵ Кавказ аполитикатә ҭагылазаашьа ҿыцқәа аԥызҵаз аиқәшаҳаҭрақәа ирықәныҟәоит.

Ихьыԥшым Аԥсны Аҳәынҭқарра – адунеи аполитикатә хсаала ҿыц иузаҟәымҭхуа иахәҭакуп. Иахьа акәымзаргьы, уаҵәы адунеи атәылақәа зегьы ари афакт азхарҵароуп.


Возврат к списку



Аԥсны иазкны

Аминистрра

Адәныҟатәи аполитика

Аконсултә дырраҭара

Аналитика

Разработка сайта: ait
АԥСНЫ АҲӘЫНҬҚАРРА АДӘНЫҞАТӘИ АУСКӘА РМИНИСТРРА E-mail: info@mfaapsny.org; Tel: +7 (840) 226-70-69; Adress:. Lakoba, 21