aps | rus | eng | tur | de | it | ar | esp | fr


Аԥсны Аҳәынҭқарра
Адәныҟатәи аусқәа рминистрра

Аимадаратә информациа:
Аҭыӡҭыԥ: 384900 Лакоба имҩа 21, ақ. Аҟәа
+7 940 996 39 48 (амоб.)
+7 840 226 39 48 (аус.)
E-mail: visa@mfaapsny.org


Гал ақалақь аҟны имҩаԥысит изаамҭанытәиу, 47-тәи аинцидентқәа раԥырҟәҟәаарази хырыҩ рыҭарази Амеханизм алахәылацәа реиԥылара
Приднестровтәи Молдавтәи Ареспублика адәныҟатәи аусқәа Рминистрра аҿы Даур Ақаҩбеи Витали Игнатиеви реиҧылара мҩаҧысит

Аԥсны Адәныҟатәи аусқәа рминистр Виачеслав Чрыгба Ҭырқәтәылатәи Ареспублика ақалақь Сиде аҟнытә аделегациа идикылеит 24.11.2012

Аԥсны Адәныҟатәи аусқәа рминистр Виачеслав Чрыгба Ҭырқәтәылатәи Ареспублика ақалақь Сиде аҟнытә аделегациа идикылеит

Аԥсны Адәныҟатәи аусқәа рминистр Виачеслав Чрыгба Ҭырқәтәылатәи Ареспублика ақалақь Сиде аҟнытә аделегациа идикылеит. Аделегациа аиҳабыс дыҟан Сиде амуниципалитет Ахада Кадыр Учар. Аделегациа Аԥсныҟа раара хықәкыс иаман ақалақьқәа Аҟәеи Сидеи рыбжьара аиҩызаратә еизыҟазаашьақәа рыбжьаҵаразы Аиқәшаҳаҭра анапаҵаҩра.

Аминистр асасцәа бзиала шәаабеит ҳәа раҳәауа иазгәеиҭеит Ҭырқәтәылатәи ақалақәқәа рҟынтә ари еиԥш Аиқәшаҳаҭра ахьҳабжьоу аҩбатәи қалақьны Сиде шыҟало: уаанӡа аиԥш зеиԥшу Аиқәшаҳаҭра рыбжьаҵан Аҟәеи ҳдиаспора рацәаны иахьықәынхо ақалақь Адаԥазари рыбжьара. «Аԥсныи Ҭырқәтәылеи гәыларатә тәылақәоуп, нахьнатәгьы аҭоурыхтә еимадарақәа ҳабжьоуп. Ҳара ҳаигәырӷьоит урҭ аимадарақәза иахьа реиҭашьақәыргыларазы алшарақәа ахьыҟоу. Ҳәарада, Аԥсныи Ҭырқәтәылеи реизыҟазаашьақәа рыҿиараҿы аполитикатә уадаҩрақәа шыҟоу еилаҳкаауеит, аха зегь акоуп ԥхьаҟатәи аԥеиԥш бзиахап ҳәа ҳақәгәыӷуеит. Ҳажәларқәа мҽхакы ҭбаала русеицура иазыуасхырхап ҳәа сгәыӷуеит шәара шәаҭаара», –хәа азгәеиҭеит аминистр.

Сиде ақалақь Ахада Кадыр Учар ақалақь иқәынхо атәылауаа рҟынтә аминистр салам ииҭеит. «Ҭырқәтәылазы Кавказ аҽамадара ҿыцым. Ҭырқәтәыла иқәынхо дарбанзаалак Кавказ ахәҭаҷк илоуп. Кавказтәи адиаспора активла иалхәын Қьамал Аҭаҭиурк иаамҭазы Ҭырқәтәылатәи аҳәынҭқарра аргылара. Иахьагьы, Аԥсны иахҭнагаз аибашьра аамышьҭахь, аԥсҭазаара ҿыц аргылараҿы ҳамчқәа еибаҳҭароуп. Уажәазы ҳақалақьқәа рыбжьара акультуратә еимадарақәа рышьақәыргыларазы иаҳԥырхагоу акгьы ыҟам, ҳашнеиуа урҭ аимадарақәа аполитикатә ҵакы шьҭырхыргьы ауеит», – иҳәеит иара.

Аицәажәараҟны Виачеслав Чрыгба иазгәеиҭеит: «Аԥсны Аҳәынҭқарра ҩыза хадас иазыҟоу Урыстәылатәи Афедерациа ауп, убри аҟнытә Урыстәылеи Ҭырқәтәылеи реизыҟазаашьақәа реиӷьхара, ҳара ҳаизыҟазаашьақәагьы ибзианы ирныруеит. Аҭоурыхҭҵааҩцәа излаҭырҵаауа ала, ХХ-тәи ашәышықәса 20-тәи ашықәсқәа рзы Аԥсны ахада Нестор Лакоба Ҭырқәтәыла дыҟан, хықәкысгьы иман Аԥсныи, Урыстәылеи, Ҭырқәтәылеи реимадара аиҿкаара. Нестор Лакобеи Қьамал Аҭаҭиурки реицәажәара ашьҭахь хара имгакәа Урыстәылеи Ҭырқәтәылеи аиқәшаҳаҭра рыдыркылеит».

Аиԥылара хыркәшауа Аԥсны Адәныҟатәи аусқәа рминистр иазгәеиҭеит: «Ҭырқәтәыла аиҳабыра Аԥсны аҽамадаразы аинтерес рымоуп, аха Қырҭтәыла иҟанаҵо аҿагылара ари аус акырӡа иаруадаҩуеит. Қырҭтәыла уажәыгьы Аԥсны адунеи аҟәыҭхара иаҿуп. Аха ишыжәбо еиԥш, ҳара ҳҽазышәарақәа баша имҩамсит: иахьа ижәбар шәылшоит Аԥсныҟа иаауа ҭырқәтәылатәи аԥсыӡкратә, аидаратә ӷбақәа, ара иҟоуп имаҷымкәа еицаҳзеиԥшу анаплакқәа – аргылара, атуризм уҳәа аусхкқәа рҟны аус зуа. Ҳара хықәкыс иҳамоуп – Аԥсны адунеи иадыруа, ҳтәылауаҩшәҟәқәа азхарҵо аҟаҵара. Иахьа Аԥсныи Ҭырқәтәылеи ркультуратә еимадара ашьақәыргылараҿы ақалақь Сиде алагала рацәоуп, хашнеиуа уи цхыраагӡахоит аполитикатә еимадарақәа рышьақәыргылараҿгьы».

Аиԥылара анхыркәшаха ашьҭахь имҩаԥысит ақалақь Аҟәеи ақалақь Сидеи рыбжьара аиҩызаратә еизыҟазаашьақәа рыбжьаҵаразы Аиқәшаҳаҭра анапаҵаҩра. Аиқәшаҳаҭра рнапы аҵарҩит Аҟәа ақалақь Ахада Алиас Лабахәу, Сиде амуниципалитет Ахада Кадыр Учар.


Возврат к списку



Аԥсны иазкны

Аминистрра

Адәныҟатәи аполитика

Аконсултә дырраҭара

Аналитика

Разработка сайта: ait
АԥСНЫ АҲӘЫНҬҚАРРА АДӘНЫҞАТӘИ АУСКӘА РМИНИСТРРА E-mail: info@mfaapsny.org; Tel: +7 (840) 226-70-69; Adress:. Lakoba, 21