aps | rus | eng | tur | de | it | ar | esp | fr


Аԥсны Аҳәынҭқарра
Адәныҟатәи аусқәа рминистрра

Аимадаратә информациа:
Аҭыӡҭыԥ: 384900 Лакоба имҩа 21, ақ. Аҟәа
+7 940 996 39 48 (амоб.)
+7 840 226 39 48 (аус.)
E-mail: visa@mfaapsny.org


Гал ақалақь аҟны имҩаԥысит изаамҭанытәиу, 47-тәи аинцидентқәа раԥырҟәҟәаарази хырыҩ рыҭарази Амеханизм алахәылацәа реиԥылара
Приднестровтәи Молдавтәи Ареспублика адәныҟатәи аусқәа Рминистрра аҿы Даур Ақаҩбеи Витали Игнатиеви реиҧылара мҩаҧысит

Аԥсны Адәныҟатәи аусқәа рминистр Виачеслав Чрыгба диԥылеит Сириа иҟоу Аԥсны Аҳәынҭқарра ахаҭарнак Шьараф Маршьан 08.02.2013

Аԥсны Адәныҟатәи аусқәа рминистр Виачеслав Чрыгба диԥылеит Сириа иҟоу Аԥсны Аҳәынҭқарра ахаҭарнак Шьараф Маршьан

Шьараф Маршьан аминистр изеиҭеиҳәеит Аԥсныҟа иааз арепатриантцәа рҭагылазаашьа зеиԥшроу, аратәи аԥсҭазаара рашьцылараҿы қәҿиарақәас ирымоу, иара убасгьы рҿаԥхьа иқәгыло апроблемақәа ртәы. «Ҳара ахҵәацәа реиԥш акәӡам арахь ҳшааз, аҩныҟа ҳхынҳәит ҳәоуп ишаҳаԥхьаӡо. Акыршықәса Аԥсныҟа аара ҳазгәышьуан, уажәы ас еиԥш алшара анҳау, ҳтәылазы ҳхәарҭаны, ҳажәеи ҳуси акраҵанакуа ҳҟаларц ҳҭахуп. Ҳәарада, ари имариам усуп, аха ҳамчқәа еилаҵаны ауадаҩрақәа зегьы ҳариаароуп. Еиҳарак уадаҩрас иҳамоу, абызшәа аибамкроуп», – иҳәеит Шьараф Маршьан.

«Адаптациа апроцесс еиҳа ибзианы имҩаԥысларц азы, адиаспора ирацәажәалатәуп, аусура шцо деилыркаалатәуп, даргьы зҵаарақәак рымазар, ирҳәартә еиԥш аҭагылазаашьа рымазароуп. Ҳара лассы-лассы Сириантәи арепатриантцәеи ҳареи аиԥыларақәа мҩаԥаагоит, ицәырҵуа апроблемақәа ҳрылацәажәоит. Ҽазныкгьы Аԥсны аиҳабыреи ажәлари ҭабуп ҳәа расҳәарц сҭахуп, аамҭа хьанҭа ҳанҭагыла, иҳарҭаз ацхырааразы, иахьагьы имҩаԥырго аусқәа рзы», – ҳәа азгәеиҭеит иара.

«Иҟаҳҵо зегьы Сириа инхо ҳауаажәлар рҿаԥхьа аҟаҵара ҳуалуп», – иҳәеит аминистр – «Арепатрициазы акомитети, Адәныҟатәи аусқәа рминистрреи ҳаицтәылауаа рҭоурыхтә ԥсадгьыл ахь рырхынҳәра апроцесс иацхраауеит, ахынҳәра зҭаху рхыԥхьаӡарагьы есааира иазҳауеит. Уажәазы иҿыцны даҽа 140-ҩык раара ҳазыԥшуп. Макьана аҵыхәтәанынӡа зшьапы иқәымгылац ҳҳәынҭқарразы асҟаҩык ауааԥсыра рыдкылара ауадаҩрақәа шацугьы, урҭ рырманшәаларазы ҳара иҳалшо зегь ҟаҳҵоит».

Сириа иҟоу Аԥсны ахаҭарнак иазгәеиҭеит Сириатәи аԥсуаа реиҳараҩык Аԥсныҟа ишаахьоу, мамзаргьы арахь амҩа ишықәу, урҭ рхыԥхьаӡараҿы иҟоуп еилаԥсоу аԥсуа-адыга ҭаацәарақәагьы.

«Ҳаицтәылауааи ҳареи аҵыхәтәантәи ҳаиԥылараҿы ҳазлацәоз азҵаарақәа ируакын арепатрициа апрограммахь еилаԥсоу аԥсуа-адыга ҭаацәарақәа ралаҵара иахылҵыз апроблема. Ҳара ҳҭагылазаашьаҿы ас еиԥш аилыхра ҟаҳҵар иашам. Еилаԥсоу аԥсуа-адыга ҭаацәарақәагьы ахынҳәра анырҭахха иахәҭоу ацхыраара раҳҭароуп. Ари ҳаиҳабыра ирыӡбаз зҵаароуп. Ихынҳәыз зегьы еилых ҟамҵакәа еиҟараны ацхыраара рыҭахоит», – ҳәа аҳәамҭа ҟаиҵеит аминистр.

Аминистр Сириа иҟоу Аԥсны ахаҭарнак Шьараф Маршьан дахьиҭааз азы иҭабуп ҳәа иеиҳәеит, иагьазгәеиҭеит: «Шәареи, Сириантәи егьырҭ ҳашьцәеи ҳареи ҳаиԥыларақәа мҩаԥыслароуп, иҟоу апроблемақәа рзы ииашоу агәаанагара ҳаурц азы, нас урҭ рыӡбаразы амҩақәа еицаҳаԥшааларц азы. Ари еиԥш аиԥыларақәа еиԥҟьарада имҩаԥаҳгалоит».


Возврат к списку



Аԥсны иазкны

Аминистрра

Адәныҟатәи аполитика

Аконсултә дырраҭара

Аналитика

Разработка сайта: ait
АԥСНЫ АҲӘЫНҬҚАРРА АДӘНЫҞАТӘИ АУСКӘА РМИНИСТРРА E-mail: info@mfaapsny.org; Tel: +7 (840) 226-70-69; Adress:. Lakoba, 21